ES uvioŭ sankcyi suprać kampanij Piefcijeva i łatarej Prezidenckaha spartovaha kłuba dapoŭniena 30

Treciaj kampanijaj stali «BT Telekamunikacyi» — hienieralny sponsar Prezidenckaha spartovaha kłuba.

Dźmitryj Łukašenka.

Ministry zamiežnych spravaŭ krainaŭ Jeŭrasajuza na sustrečy ŭ Luksiemburhu pašyryli sankcyi suprać łukašenkaŭcaŭ. Jany zamarozili rachunki «troch kampanij, źviazanych z režymam».

Hetaje rašeńnie pryniataje z metaj uzmacnieńnia finansavaha cisku na biełaruskija ŭłady, kab vymusić ich spynić represii i narmalizavać adnosiny ź ES. Vyrašana taksama dadać u śpis 188-mi nieŭjaznych u ES biełaruskich słužboŭcaŭ jašče niekalki biznesoŭcaŭ.

Takim čynam, jeŭrapiejskija sankcyi ŭpieršyniu zakranuć biznes: pad ich dziejańnie padpadaje nabližany da Łukašenki biznesoviec Uładzimir Piefcijeŭ i jahonaja firma «Biełtechekspart» (handal zbrojaj), a taksama markietynhavaja firma «Sport-pary».

Suzasnavalnikam «Sport-pary» źjaŭlajecca Prezidencki spartovy kłub, jaki ŭznačalvaje Dźmitryj Łukašenka, syn kiraŭnika Biełarusi.

Ź pieršych paviedamleńniaŭ infarmacyjnych ahienctvaŭ było ciažka zrazumieć, jakaja treciaja kampanija padpała pad sankcyi. Paśla vyśvietliłasia, što heta firma «BT Telekamunikacyi» — hienieralny sponsar Prezidenckaha spartovaha kłuba. A zusim nie RUP «Biełtelekam» — nacyjanalny apieratar telekamunikacyj — jak toje spačatku napisali niekatoryja infarmacyjnyja ahienctvy.

Na sajcie Prezidenckaha spartovaha kłuba pišacca, što «PUP «BT Telekamunikacyi» ŭdzielničaje ŭ realizacyi šerahu bujnych inviestycyjnych prajektaŭ, u tym liku źviazanych z realizacyjaj i farmavańniem vysakajakasnaj infrastruktury dla praviadzieńnia ŭ 2014 hodzie ŭ Respublicy Biełaruś suśvietnaha pieršynstva pa chakiei».

Šyroka viadomyja ŭ vuzkich kołach «BT Telekamunikacyi» adznačylisia taksama, kali prapanavali supolna z amierykanskaj firmaj GTECH śpiecyjalnuju kampjutarnuju kasavuju sistemu, jakaja kantralavała b infarmacyju ab hrašovych patokach załaŭ hulniavych aŭtamataŭ u Biełarusi.

Što da Piefcijeva, to bruselskaje vydańnie Euobserver.com nazyvaje jaho «pryvatnym bankiram Alaksandra Łukašenki». Aficyjna Piefcijeŭ uznačalvaje biełaruskuju kampaniju-eksparciora ŭzbrajeńniaŭ «Biełtechekspart» i biełaruskuju Fiederacyju tenisa. Vydańnie vykazvaje mierkavańnie, što jon taksama trymaje častku akcyj mabilnaha apieratara pradpryjemstva Velcom, Pryjorbanka i Źniešekanambanka. Časopis Forbes u 2010 hodzie nazvaŭ jaho druhim paśla Alaksandra Łukašenki pa bahaćci čałaviekam Biełarusi, acaniŭšy jahonaje bahaćcie na 1 miljard dalaraŭ.

Jeŭrasajuz taksama ŭvioŭ embarha na pastaŭku ŭ Biełaruś zbroi i materyjałaŭ, jakija mohuć vykarystoŭvacca dla padaŭleńnia hramadstva.

Rada Ministraŭ ES adznačyła try hałoŭnyja prablemy.

Najpierš heta palityčny pieraśled, u tym liku źniavoleńnie eks-kandydataŭ u prezidenty. U tym liku vykazvaje «svaju hłybokuju zakłapočanaść u suviazi z paviedamleńniami ab katavańniach i inšych formach žorstkaha abychodžańnia ŭ biełaruskich turmach i nastojliva zaklikaje ŭłady pavažać mižnarodnyja abaviazacielstvy, što ŭziała na siabie Biełaruś, u pryvatnaści, poŭnuju zabaronu na prymianieńnie katavańniaŭ i žorstkaha, biesčałaviečnaha i źnievažalnaha abychodžańnia».

Pa-druhoje, heta parušeńni prava na svabodu słova. ES zhadvaje iski na zakryćcio «Našaj Nivy» i «Narodnaj Voli». zakryćcio «Aŭtaradyjo» i sud nad Pačobutam.

Pa-treciaje, i heta davoli niečakana, ES «zaklikaje Biełaruś pavažać normy dypłamatyčnaha imunitetu ... i spynić zapałochvańnie i pieraśled» dypłamatyčnaha piersanału krain ES u Biełarusi. Mahčyma, isnujuć niejkija fakty, pra jakija biełaruskija ŚMI nie viedajuć.

ES vitaje rašeńnie Jeŭrapiejskaha banka rekanstrukcyi i raźvićcia admovicca ad prajektaŭ z udziełam dziaržaŭnych pradpryjemstvaŭ Biełarusi.

U toj ža čas ES vykazvaje namier vieści pieramovy ź biełaruskim bokam pra readmisiju i spraščeńnie vizavaha režymu.

Rada Ministraŭ ES zajaŭlaje, što ŭ vypadku dalejšaha paharšeńnia situacyi hatovy razhladać pytańnie «ab dalejšych kropkavych mierach va ŭsich halinach supracoŭnictva pa miery nieabchodnaści».

Ministr zamiežnych spravaŭ Polščy Radasłaŭ Sikorski paviedamiŭ u svaim tvitary paśla pryniaćcia rašeńniaŭ pra sankcyi: «My ŭchvalili embarha na handal zbrojaj i zamarozili aktyvy firmaŭ, jakija finansujuć Łukašenku. Jon musić vybrać darohu: da demakratyi abo ŭ Haahu».

* * *

Što takoje «Sport-pary» i čym jano vałodaje

Zakrytaje akcyjaniernaje tavarystva «Sport-pary» zarehistravana 6 vieraśnia 2007 hoda i źjaŭlajecca pieršym apierataram elektronnych interaktyŭnych hulniaŭ na terytoryi Biełarusi.

Suzasnavalnikami «Sport-pary» byli biełaruska-anhlijskaje pradpryjemstva «Dziełavaja sietka», Prezidencki spartovy kłub (uznačalvaje siaredni syn Łukašenki — Dźmitryj), a taksama PUP «SIEN-KO».

Na siońnia pieršyja dvoje zastajucca akcyjanierami tavarystva. Taksama da ich dałučajecca PUP «BT Telekamunikacyi».

Da «Sport-pary» naležać nastupnyja łatarei: «Sportłato 5 z 36», «KIENA», «Sport-prahnoz». Simvałam tavarystva źjaŭlajecca sava.

Taksama ŭ Biełarusi isnujuć łatarejnyja kampanii «Biełaruskija łatarei» (pravodzić pieradaču «Vaša łato») i «Nacyjanalnyja spartyŭnyja łatarei» («Supierłato»).

NN.BY

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH