Maładafrontaviec Juljan Misiukievič try miesiacy sprabuje vyśvietlić, chto dazvoliŭ prasłuchoŭvać jaho telefon. Pakul biezvynikova.
Juljan Misiukievič.
21-hadovy student BDU prachodziŭ u jakaści śviedki pa spravie ab tak zvanych masavych biesparadkach 19 śniežnia 2010 hoda. I padčas čarhovaha dopytu ŭ sakaviku jamu dali prasłuchać zapisy jaho telefonnych razmoŭ za listapad-śniežań minułaha hoda. Pa słovach Misiukieviča, bolšaść tych razmoŭ adbyłasia da padziej na Płoščy. I jamu niezrazumieła, u ramkach jakoj kryminalnaj spravy orhany mahli jaho «słuchać».
Juljan nakiravaŭ zvarot u Hienieralnuju prakuraturu, dzie paprasiŭ paviedamić, kali i jaki prakuror daŭ dazvoł na prasłuchoŭvańnie. Z Hienprakuratury zvarot nakiravali ŭ prakuraturu Viciebskaj vobłaści (dapytvaŭ Misiukieviča śledčy z UKDB pa Viciebskaj vobłaści Byčak, jaki ŭ Minsku znachodziŭsia ŭ kamandziroŭcy). Tam adkazali, što Byčak pracavaŭ u składzie apieratyŭnaj hrupy, jakaja zajmałasia rasśledavańniem kryminalnaj spravy pa «masavych biesparadkach». I, maŭlaŭ, nahlad za zakonnaściu rasśledavańnia maje pravodzić prakuratura Minska. Staličnaja ž prakuratura adpraviła zvarot... iznoŭ u Hienprakuraturu. Adkul pačynaŭ maładafrontaviec, tudy i viarnuŭsia. A na minułym tydni pryjšoŭ čarhovy adkaz z Hienprakuratury. Ź jaho vynikaje, što zvarot maładafrontaŭca nakiravany ŭ KDB «dla razhladu pa sutnaści».
Juljan Misiukievič aburany faktam prasłuchoŭvańnia. «Raz užo maje razmovy słuchaŭ KDB,
ja chaču viedać, jakuju niebiaśpieku ŭjaŭlaju dla krainy. Kali ž heta byli niezakonnyja dziejańni, chaj prakuratura raźbiarecca z hetym faktam»,
— kaža jon.
