U Maskvie zaniepakojenyja apošnimi dziejańniami pravaachoŭnych orhanaŭ Biełarusi pa zatrymańni demanstrantaŭ i žurnalistaŭ, u tym liku z Rasii, zajaviŭ na bryfinhu 7 lipienia aficyjny pradstaŭnik Ministerstva zamiežnych spraŭ RF Alaksandr Łukaševič.
«Sam fakt užyvańnia takich zachadaŭ u dačynieńni da mirnych demanstrantaŭ vyklikaje zaniepakojenaść. Raźličvajem, što biełaruskaje kiraŭnictva budzie ŭ poŭnaj miery vykonvać viadomyja mižnarodnyja normy ŭ halinie pravoŭ i asnoŭnych svabod», — pryvodzić słovy Łukaševiča RIA Novosti.
Jon nahadaŭ, što raniej u Maskvie nie raz vykazvali zaniepakojenaść takimi dziejańniami biełaruskich uład.
«Achviarami ich [dziejańniaŭ] robiacca vielmi časta, i ŭ apošnija dni asabliva, rasijskija žurnalisty. Praŭda, ich adpuskajuć», — zaznačyŭ Łukaševič.
Pavodle źviestak pravaabaroncaŭ, uviečary 6 lipienia padčas akcyi maŭklivaha pratestu ŭ Biełarusi było zatrymana prykładna 400 čałaviek. Usiaho za čas praviadzieńnia akcyj, arhanizavanych hrupaj «Revalucyja praz sacyjalnyja sietki», jakija prachodziać u Biełarusi z 8 červienia, było zatrymana kala 1.730 čałaviek. Siońnia nad zatrymanymi prachodziać sudy.
