Vy budziecie śmiajacca, ale, napiaredadni pačatku pracesu ab likvidacyi haziety, «Naša Niva» atrymała novaje papiaredžańnie. Jaho siońnia śpiešna z kurjeram dastavili ŭ redakcyju paśla 17.00, a paśla jašče dasłali faksam ź Ministerstva infarmacyi.
Hetym razam ministerstva pilna ŭhledziełasia ŭ vychodnyja źviestki numaru «NN» ad 1 červienia 2011 hoda i zaŭvažyła, što tam, u parušeńnie art.22 Zakonu ab ŚMI, nie ŭkazany padpisny indeks!
Zazvyčaj «NN» drukuje padpisnyja indeksy na staroncy 2, u błoku infarmacyi dla čytačoŭ. Tamu i zachaplaje pilnaść pozirku śpiecyjalistaŭ ideałahičnaha viedamstva: toj numar byŭ ADZINYM, dzie błoku ź indeksami nie było. Na jaho miescy stajaŭ artykuł «Vyšejšy haspadarčy sud adkryŭ darohu da zakryćcia «Našaj Nivy».
Pavodle ciapierašniaha biełaruskaha zakanadaŭstva ŭ halinie ŚMI navat takaja farmalnaja pryčepka moža paciahnuć za saboj zakryćcio vydańnia. I precedenty ŭžo byli: tak, hazietu «Zhoda» likvidavali za toje, što ŭ vychodnych źviestkach nie było paznačanaje poŭnaje imia hałoŭnaha redaktara. Padobnaha charaktaru pretenzii vyklikali represiŭnyja miery suprać časopisa ARCHE, haziety «Salidarnaść».
Na dumku jurystaŭ, u vypadku «NN» Ministerstva infarmacyi tak pierastrachoŭvajecca. Pavodle zakanadaŭstva, možna likvidavać vydańnie, kali jano maje dva i bolej papiaredžańni. Tym časam 22 i 26 lipienia skančajecca termin dziejańnia dvuch papiaredžańniaŭ, atrymanych «NN» letaś za publikacyi źviazanyja ź filmam «Chrosny baćka». A 14 lipienia projduć try miesiacy ad momantu atrymańnia apošniaha papiaredžańnia, ciaham jakich, pavodle zakanadaŭstva, hazietu možna začynić. I kali nie ŭdasca likvidavać «NN» u bližejšy čas, novaje papiaredžańnie budzie nahodaj raspačać novuju spravu ab likvidacyi.
Darečy, damokłaŭ mieč Pralaskoŭskaha visić i nad dziaržaŭnaj hazietaj «Respublika», zasnavanaj Savietam ministraŭ: u jaje vychodnych źviestkach taksama niama padpisnych indeksaŭ:
Ale štości nie było čuvać, kab «Respubliku» karali za heta.
