Dziciačy konkurs «Viciebsk-2011» vyjhrała pradstaŭnička Rumynii Rałuka 1

Pradstaŭnica Biełarusi Alaksandra Niachaj trapiła ŭ lik łaŭreataŭ treciaj premii IX Mižnarodnaha dziciačaha muzyčnaha konkursu «Viciebsk-2011».

Dzieviacihadovaja salistka choru «Malinki» pry muzyčnaj škole № 4 Minska i salistka ansambla tanca «Ravieśnik» padzialiła hetu ŭznaharodu ŭ 1.000 dołaraŭ z udzielnicaj z Ukrainy Marjanaj Ščarbak i kankursantam z Bałharyi Marcinam Jardanavym. Vyniki konkursu abvieščany viečaram 14 lipienia padčas hała-kancerta «Kraina cudaŭ» u kancertnaj zale «Viciebsk».

Druhuju premiju ŭ 2.000 dołaraŭ mižnarodnaje žury taksama vyrašyła raździalić. Jana dastałasia pradstaŭnicy Łatvii Valeryi Čuvizavaj i vykanaŭcu z Azierbajdžana Džentlmienu.

Pieršaja premija ŭ 3.000 dołaraŭ adpravicca ŭ Kazachstan razam ź junaj śpiavačkaj Kurałaj Miejrambiek, jakaja kranuła žury i hledačoŭ cudoŭnym vykanańniem pieśni na biełaruskaj movie. Mnohich ździviła, što dzieviacihadovaja dziaŭčynka, pieramožnica i łaŭreat roznych fiestyvalaŭ dziciačaj tvorčaści ŭ siabie na radzimie, śpiavała biez charakternaha akcentu, jaki zvyčajna byvaje ŭ vychadcaŭ ź niesłavianskich dziaržaŭ.

***

Rałuka.

Hran-pry ciapierašniaha dziciačaha konkursu, jak i letašniaha, pajedzie ŭ Rumyniju.

Hetym razam jaho zavajavała 10-hadovaja Rałuka, nieadnarazovaja pieramožnica roznych nacyjanalnych i mižnarodnych pieŭčych konkursaŭ. Minułym razam pieramohu na viciebskim konkursie śviatkavaŭ jaje suajčyńnik Marya. Vyšejšaja ŭznaharoda dziciačaha konkursu składaje 5.000 dołaraŭ.

Pavodle tradycyi byli taksama ŭručany śpiecyjalnyja pryzy ad Parłamienckaha schodu Sajuza Biełarusi i Rasii. Ich atrymali kankursantki z krain Sajuznaj dziaržavy, jakija nie ŭvajšli ŭ lik łaŭreataŭ, — Hanna Atroščanka ź Biełarusi i Volha Kazazojeva z Rasii.

U IX Mižnarodnym dziciačym muzyčnym konkursie «Viciebsk-2011» brali ŭdzieł 23 junyja vykanaŭcy z 20 krain. Ad Biełarusi, Rasii i Ukrainy tradycyjna ŭdzielničali pa dva kankursanty. Žury ŭznačalvaŭ zasłužany artyst Rasii Siarhiej Šuścicki. Biełaruś u sudziejskaj kamisii pradstaŭlaŭ ŭładalnik Hran-pry darosłaha konkursu ŭ 2004 hodzie Piotr Jałfimaŭ.

Letašni dziciačy konkurs prynios Biełarusi anałahičny vynik: Złacie Łarčancy, vychavancy viadomaha biełaruskaha piedahoha Śviatłany Stacenki, u 2010 hodzie ŭdałosia ŭźniacca tolki na treciuju prystupku, pryčym premiju joj daviałosia padzialić z udzielnicaj z Kazachstana Ajaru Armanavaj.

0

0

0

0

0

0