Sudovaja kalehija Minskaha haradskoha suda pakinuła bieź źmienaŭ prysud eks-kandydatu ŭ prezidenty Andreju Sańnikavu, a taksama ŭdzielnikam mitynhu apazicyi 19 śniežnia 2010 hoda Alehu Hniedčyku, Uładzimiru Jaromienku, Illi Vasileviču i Fiodaru Mirzajanavu.
Sudździ — Siarhiej Chrypač, Viktoryja Zajcava, Volha Kamaroŭskaja, prakuror — Anton Zaharoŭski.
Abvinavačanyja na sudzie nie prysutničali, bo adbyvajuć pakarańnie ŭ papraŭčych ustanovach.
Advakat zajaviŭ chadajnictva ab vykliku Sańnikava na razhlad skarhi. Abarona taksama paprasiła dałučyć da spravy spravazdaču Biuro pa demakratyčnych instytutach i pravach čałavieka ABSIE ab chodzie vybaraŭ prezidenta, tamu što tam dajecca acenka vybaraŭ, jakaja supiarečyć zaklučeńniu suda.
Paśla niepraciahłaj narady sudździ pryniali rašeńnie admović u pieršym chadajnictvie — dastaŭcy Sańnikava ŭ sud, ale zadavolić druhoje — ab dałučeńni da spravy spravazdačy BDIPČ ABSIE.
***
14 maja sud Partyzanskaha rajona Minska pad staršynstvam sudździ Natalli Čaćviartkovaj pryznaŭ Sańnikava vinavatym na padstavie artykuła 293 častki 1 Kryminalnaha kodeksa (arhanizacyja masavych biesparadkaŭ) i pryhavaryŭ jaho da piaci hadoŭ pazbaŭleńnia voli z adbyvańniem pakarańnia ŭ kałonii ŭzmocnienaha režymu. Eks-kandydat u prezidenty adbyvaje pakarańnie ŭ Navapołackaj kałonii.
Aleh Hniedčyk pryhavorany da čatyroch hadoŭ uzmocnienaha režymu, Uładzimir Jaromienak, Ilja Vasilevič i Fiodar Mirzajanaŭ — da troch hadoŭ źniavoleńnia ŭ kałonii ŭzmocnienaha režymu.
