Pra heta žurnalistam 20 lipienia ŭ Minsku paviedamiŭ pasoł Biełarusi ŭ Litvie Uładzimir Dražyn.
«Śledam za pramymi zamiežnymi inviestycyjami Litvy ŭ Biełaruś idzie i žadańnie litoŭskich inviestaraŭ pryvatyzavać šerah biełaruskich pradpryjemstvaŭ», — skazaŭ pasoł.
U pryvatnaści, pavodle jaho słoŭ, razhladajecca mahčymaść nabyćcia litoŭcami aktyvaŭ Mazyrskaha kambinata «Etanoł», Minskaha marharynavaha zavoda, jakija mohuć atrymać inviestycyi litoŭskich kampanij.
Razam z tym Dražyn nie maje vialikich iluzij adnosna pierśpiektyŭ uvachodžańnia ŭ Biełaruś litoŭskaha bankaŭskaha kapitału.«Siońnia bankaŭski kapitał Litvy pradstaŭleny najpierš šviedskim, narviežskim i finskim kapitałam. A heta ŭžo nie pramaja zacikaŭlenaść krain», — zaŭvažyŭ Dražyn. Pavodle jaho słoŭ, «ciapier iduć pieramovy. Jany mohuć być paśpiachovymi pry najaŭnaści dobraj voli ŭsich bakoŭ, skandynaŭskich krain, krain Bałtyi i Biełarusi».
Raniej pra mahčymaje ŭvachodžańnie litoŭskaha kapitału ŭ biełaruski bankaŭski siektar zajaŭlali pradstaŭniki Nacbanka.
Tym nie mienš Dražyn stanoŭča aceńvaje inviestycyjnaje ŭzajemadziejańnie Biełarusi i Litvy. Jon adznačyŭ, što ŭ apošnija hady idzie sistemnaja intehracyja dźviuch ekanomik.
Tak, za minuły hod pramyja zamiežnyja inviestycyi (PZI) ź Biełarusi ŭ Litvu skłali 53 młn. dołaraŭ, ź Litvy ŭ Biełaruś — 49,5 młn. dołaraŭ. U pieršaj pałovie hetaha hoda z zapłanavanych 60 młn. dołaraŭ PZI ŭžo pryciahnuta bolš za 40 młn. dołaraŭ.
Pavodle słoŭ Dražyna, litoŭskija inviestycyi nakiroŭvajucca na stvareńnie pramysłovych ekspartna aryjentavanych vytvorčaściaŭ. U pryvatnaści, budujecca zavod pa vytvorčaści sprasavanych plit u SEZ «Mahiloŭ». Abjom inviestycyj u prajekt składaje 120 młn. jeŭra. Hadavy abjom ekspartu na hetaj vytvorčaści składzie prykładna kala 200 młn. jeŭra.
Zaviaršajecca budaŭnictva
Idzie budaŭnictva šerahu pradpryjemstvaŭ pa pierapracoŭcy sielskahaspadarčaj pradukcyi — małaka i miasa. «My razhladajem šerah takich prajektaŭ, jakija buduć realizavanyja ŭ Minskaj, Mahiloŭskaj, Hrodzienskaj abłaściach», — adznačyŭ pasoł.
Pry hetym jon dadaŭ, što prablemy na valutnym rynku Biełarusi nijak nie adbilisia na pracy litoŭskich inviestaraŭ.
