Prymusovaje vysialeńnie Partyi BNF sa staličnaha ofisa pa praśpiekcie Mašerava, 8, adbudziecca 26 lipienia ŭ 10 hadzin. Pra heta BiełaPAN paviedamiŭ namieśnik staršyni partyi Ryhor Kastusioŭ.
"Nam pryjšło paviedamleńnie ad sudovaha vykanaŭcy, u jakim havorycca ab časie prymusovaha vysialeńnia. U im taksama havorycca, što ŭ vypadku nieabchodnaści ŽREA pavinna zabiaśpiečyć prymusovaje ŭskryćcio zamkoŭ z nastupnaj ich zamienaj, a RUUS Savieckaha rajona — nakiravać supracoŭnikaŭ dla zabieśpiačeńnia pravaparadku", — paviedamiŭ palityk.
Kastusioŭ zaznačyŭ, što dla tych, chto pryjdzie vysialać partyju,
"rychtujucca siurpryzy".
Jon taksama paviedamiŭ, što ŭ partyi jość zapasny varyjant z ofisam, prezientacyja jakoha budzie zroblena ŭ najbližejšyja dva tydni.
***
Nahadajem, 10 maja haspadarčy sud Minska pryniaŭ rašeńnie vysielić Partyju BNF, hramadskaje abjadnańnie "BNF "Adradžeńnie", a taksama ich minskija haradskija i abłasnyja struktury sa staličnaha ofisa pa praśpiekcie Mašerava, 8. 21 červienia kalehija haspadarčaha suda admoviła ŭ zadavalnieńni kasacyjnaj skarhi partyi.
Zaraz partyja sprabuje abskardzić rašeńnie haspadarčaha suda ŭ Vyšejšym haspadarčym sudzie. Pavodle słoŭ Kastusiova, data razhladu skarhi pakul nie vyznačana.
Staličny ofis pa praśpiekcie Mašerava, 8, arandavaŭsia Partyjaj BNF z 1992 hoda. Dziejny termin arendy zakončyŭsia 31 sakavika 2011 hoda. ŽREA Savieckaha rajona admoviłasia zaklučać novy dahavor arendy i padali isk ab vysialeńni struktur Partyi BNF z pamiaškańnia. Svaje dziejańni ŽREA rastłumačyła nieabchodnaściu dalejšaha vykarystańnia pamiaškańnia "dla ŭłasnych patreb".
