22 lipienia ŭ Ivacevickaj kałonii «Vaŭčynyja nory» pabralisia šlubam Pavał Vinahradaŭ i Śviatłana Harochavik.
Śviatłana Harochavik. Fota «Jeŭraradyjo».
Pavieł Vinahradaŭ. Fota Siarhieja Hudzilina.
Na ŭračystuju cyrymoniju dapuścili baćkoŭ i śviedak. Niaviesta była ŭ čyrvonaj sukiency, a žanich, niahledziačy na dazvoł pieraapranucca ŭ cyvilnaje, vyrašyŭ zastacca ŭ turemnaj robie. Baćka žanicha Jury Vinahradaŭ paviedamiŭ Radyjo Svaboda, što ŭsio adbyłosia cudoŭna: «U kalonii vielmi dobra pastavilisia da viasiella. Pa-čałaviečy pastaviŭsia namieśnik načalnika. I śviedkam, i rodnym dali propuski, dazvolili ŭbačycca z Pašam. Z nami było jašče adno viasielle, dyk tam navat rodnym nia ŭsim dazvolili prysutničać».
Karespandentka: «Takim čynam, u Ivacevickaj kalonii siońnia dva viasielli było?».
«Tak, dźvie pary raśpisvalisia. Krychu, praŭda, zaciahnułasia, bo čakali, pakul pryjedzie pradstaŭnica ZAHSu raśpisvać. Na KPP jość admysłovy pakoj dla rośpisu. Vielmi chutka Pašu i Śvietu raśpisali, ale heta, mahčyma, i dobra, bo narmalna achova da nas pastaviłasia. Nam usim dali čas — prykładna paŭhadziny, z Pašam usie paśpieli parazmaŭlać. Nahavarycca, viadoma, nie, ale pahavaryć paśpieli ŭsie. Pavał — małajčyna, trymajecca dobra, krychu schudnieŭ, ale jon aptymist, viasioły».
Karespandentka: «Śviatłana nabyła takuju pryhožuju čyrvonuju sukienku. A ci dazvolili Pašu pieraapranucca? Albo ŭ robie daviałosia pabracca šlubam?».
«U pryncypie, dazvolili, i my navat uziali vopratku. Ale Pavał admoviŭsia. Paša skazaŭ, što nia toj heta vypadak, i ŭ robie turemnaj raśpisvaŭsia».
Karespandentka: «Śviatłana ŭčora stolki prysmakaŭ na viasielle nakuplała…».
«Tak, ledźvie daciahnuli my hetyja sumki da KPP. Ale tam joj dali vazok i dapamahli».
Karespandentka: «Śviatłanie na troje sutak dazvolili spatkańnie?».
«Tak, adzinaje — u paniadziełak u kalonii sanitarny dzień, i tolki da 10 hadziny budzie spatkańnie. Mahło być da 17-j hadziny, ale vyjdzie tolki da 10-j».
Zrabić fota na pamiać maładym na viasielli nie dazvolili, bo kalonija ličycca režymnym abjektam. Zaručalnych piarścionkaŭ taksama nie było, bo ŭ turmie nasić piarścionki nielha. Ale Śviatłana spadziajecca, što jak tolki Pavał vyjdzie na svabodu, abiaviazkova padoryć joj piarścionak — heta ž mužčynskaja sprava.
