Apublikavany płan udzielnikaŭ supołki «Revalucyi praz sacyjalnuju sietku» na hetuju sieradu. Akcyja adbudziecca. Praŭda, nie ŭ zusim zvykły čas. Pačatak zapłanavany na 13:00.
Maderatary supołki zaklikajuć ludziej prychodzić na centralnyja rynki svaich haradoŭ. «Prychodzim na rynak, znachodzim zakrytyja handlovyja kropki. Spačatku ich budzie niamnoha, ale niekalki zaŭsiody možna znajści. Staim kala ich, nibyta čakajučy adkryćcia. Praz paŭhadziny akcyja skončanaja. Kali ŭłady buduć začyniać rynki, to źbirajemsia la hałoŭnaha ŭvachoda. U metach biaśpieki — nie chłopajem», — pišuć arhanizatary.
«My razumiejem, što mnohija ŭ hety čas znachodziacca na pracy. U vypadku pośpiechu budziem pravodzić akcyi ŭ suboty», — ličać maderatary supołki.
Paviedamlajecca, što arhanizatary viaduć pieramovy z pradprymalnikami, kab jany padtrymali akcyju. Ź inicyjatyvaj pradprymalnickaha strajku pa sieradach vystupiŭ niadaŭna adzin ź lidaraŭ drobnych handlaroŭ Viktar Harbačoŭ.
Pryvodzicca taksama śpis rynkaŭ abłasnych centraŭ. Što datyčyć rajonaŭ, to tam zaklikajuć prychodzić da najbolšaha rečavaha rynku.
Akcyi maŭklivych pratestaŭ pačalisia 1 červienia. Jany achapili nie tolki Minsk, ale i rehijony. Na akcyju 22 červienia ŭ stalicy vyjšła niekalki tysiač čałaviek, u abłasnych centrach było la tysiačy.
Tym nie mienš, paśla ŭžyvańnia ŭłady fizičnaj siły suprać demanstrantaŭ (aryštaŭ, źbićcia), kolkaść udzielnikaŭ pačała źnižacca. Arhanizatary šukali inšyja varyjanty akcyj, ale vyjści na raniejšy ŭzrovień bolš nie atrymlivałasia.
U minułuju sieradu da Kastryčnickaj płoščy vyjšła niekalki socien čałaviek, pry hetym što Płošča ačeplenaj nie była.
Darečy, 27 lipienia — heta Dzień uznaŭleńnia biełaruskaj niezaležnaści (1990), ale nijaki akcent na hetym rabicca nie budzie.
