Jaje padrychtavali niamieckija i biełaruskija historyki dla Fonda daśledavańnia kamunistyčnych dyktatur (Hiermanija).
Kniha «Miescy pamiaci achviaraŭ kamunizmu ŭ Biełarusi» pad redakcyjaj Anny Kaminski, kiraŭnicy aparata Fonda daśledavańnia dyktatury Sacyjalistyčnaj adzinaj partyi Hiermanii, źjaviłasia ŭ internecie.
Jaje možna spampavać biaspłatna.Niamieckamoŭnaja viersija ŭžo pastupiła ŭ prodaž u Hiermanii.
Siarod aŭtaraŭ knihi — Iryna Kaštalan z tekstam «Biełaruś pad upłyvam palityčnych represij savieckaha času (1917–1953 hh.)», Ihar Kuźniacoŭ («U pošukach praŭdy ab Traściancy»), Roni Chajdenrajch («Pamiać pra achviar stalinizmu ŭ Biełarusi»), Alena Tempier («Niama spakoju dla zabitych u Kurapatach. Padzielenaja pamiać u postsavieckaj Biełarusi»), Fieliks Akierman («Savietyzacyja i pamiać. Transnacyjanalnaja pamiać pra stalinskija represii ŭ Zachodniaj Biełarusi») dy inšyja. Kniha bahata ilustravanaja fotazdymkami.
Z pradmovy da knihi «Miescy pamiaci achviaraŭ kamunizmu ŭ Biełarusi»
«U śniežni 2010 hoda ŭ Biełarusi byli siłaj zadušany pratesty suprać sfalsifikavanych vybaraŭ. Bolš za 700 čałaviek było aryštavana, siarod ich — amal usie apazicyjnyja palityki, što prymali ŭdzieł u vybarach, vystupiŭšy suprać aŭtarytarnaha prezidenta Łukašenki, jaki kiruje krainaj z 1994 hoda. Prymianieńnie siły ŭ adnosinach da dysidentaŭ padkreślivaje adsutnaść pavahi da pravoŭ čałavieka i hramadzianina ŭ hetaj apošniaj dyktatury Jeŭropy. Ruchnuli nadziei na demakratyčnyja pieraŭtvareńni ŭ krainie, na zbližeńnie ź Jeŭrapiejskim sajuzam i jaho normami ŭ śfiery achovy pravoŭ čałavieka i hramadzianina. U toj ža čas apošnija padziei adlustroŭvajuć biaśsille Jeŭrasajuza ŭ adnosinach da dyktatury, samavolstva i złoŭžyvańnia ŭładaj u samym centry Jeŭropy.
Pradstaŭlenyja ŭ hetaj knizie pamiatnyja znaki, miemaryjały i pomniki, jakija nahadvajuć pra złačynstvy i achviary kamunistyčnaj dyktatury ŭ Biełarusi, majuć aktualnaje palityčnaje značeńnie. Mnohija z hetych pomnikaŭ i miemaryjałaŭ pryśviečany masavamu supracivu dziaržaŭnaj uładzie. Mnohija nieadnarazova razburalisia. Tolki ŭ redkich vypadkach udavałasia aryštavać złačyncaŭ. Ciažkuju historyju budaŭnictva hetych pomnikaŭ i zachavańnia pamiaci pra achviary niespraviadlivaści i złačynstvaŭ dapaŭniaje toj fakt, što Łukašenka zahadaŭ stvaryć kopiju pomnika Fieliksu Dziaržynskamu, aryhinał jakoj stajaŭ kaliści pierad štabkvateraj orhanaŭ dziaržbiaśpieki na Łubiancy. Pierad pomnikam hetamu złačyncu ŭ dvary MUS Biełarusi składajuć prysiahu navabrancy dla milicyi i śpiecsłužbaŭ, abaviazvajučysia vykonvać biesčałaviečnyja dziejańni, tradycyi prymianieńnia jakich, jak zdavałasia, byŭ pakładzieny kaniec u epochu hałosnaści i pierabudovy.
Na hetym fonie asablivuju vahu nabyvaje materyjał ab zachavańni pamiaci pra stalinski režym, padrychtavany Fiederalnym fondam pa vyvučeńni dyktatury SAPH u supracoŭnictvie sa šmatlikimi mužnymi partniorami ź Biełarusi».
