«Tabie kala piacidziesiaci? Pryjdzi da nas i dapracuj da pensii!» — zaklikaje ŭ Polščy najbujniejšaja sietka fast‑fudu. McDonald's patrabuje rabotnikaŭ u starejšym uzroście na miesca maładych, jakija ŭsio čaściej źjaždžajuć za miažu.
«Maja praca takaja ž cikavaja, jak i knihi, jakimi ja zachaplajusia», — uśmichajecca z‑pad akularaŭ 49‑hadovaja Hanna, rabotnica hdańskaha McDonald's, z papiarovaj reklamy na padnosie. Pobač — vialiki nadpis: «Praca čakaje na Ciabie!». I źnizu zaklik: «Pani i panovie! Kali Vy hetak ža, jak i ja, užo daŭhi čas šukajecie cikavuju pracu, jakaja była b dla vas vyklikam, — naviedajcie McDonald's. Heta cudoŭnaje miesca, paviercie mnie!». Takuju reklamu atrymlivaje razam ź ježaj kožny naviedvalnik McDonald's.
McDonald's u nas chutčej asacyjujecca sa studentami, što mitusiacca ŭ vypareńniach smažanaj bulby‑fry. Da hetaha času firma brała na pracu ŭ asnoŭnym moładź, bo vosiem hadzin tut treba pracavać na nahach. Dla hetaha nieabchodnyja tryvałaść, mocnyja nohi i hatoŭnaść da źmiennaj pracy z samaj ranicy i da poźniaha viečara.
Adnak siońnia McDonald's u Polščy adčuvaje vyniki chvali zarobkavaj emihracyi. Asabliva ŭ vialikich haradach, dzie vielmi ciažka znajści rabotnikaŭ. «Ludzi siaredniaha ŭzrostu ŭžo majuć stabilnaje žyćcio. U ich jość siemji, i jany ŭžo nie takija advažnyja, kab kinuć usio i źjechać», — kaža pradstaŭnik polskaha McDonald's.
Pryblizna na 10 tys. rabotnikaŭ u 210 restaracyjach McDonald's prypadaje ŭžo niedzie kala sotni babul. Niekatoryja ź ich pracujuć tut niekalki hadoŭ. 47‑hadovaja Ela Mańk trapiła na hetuju pracu dzieviać hadoŭ tamu — syn, viartajučysia sa škoły, znajšoŭ ulotku z prapanovaj pracy. «U siaredzinie 90‑ch u mianie nie było pracy. Tady ja padumała: ja ž lublu pracavać, lublu ludziej, nu j pasprabuju», — kaža jana. Pačynała jana z taho, što vučyłasia rabić buterbrody, bo pavodle instrukcyi heta vyhladaje inačaj, čym udoma. Paśla jana prybirała zalu, absłuhoŭvała McDrive. Siońnia jana instruktar i navučaje novych rabotnikaŭ . «Ustavać davodzicca a 4.20. A piataj ja vychodžu z domu, kilametar idu praź les na prypynak, siadaju ŭ aŭtobus i a 5.30 ja ŭžo na miescy. Skančaju pracu a 14.30, ale časam pracuju i na druhuju źmienu — tady pačynaju a 14, a skančaju a 23», — raspaviadaje Ela.
Ciapier rabotnikami siaredniaha ŭzrostu taksama pačynajuć cikavicca i inšyja firmy, siarod jakich Gillette, Dell, Indesit. Najnoŭšaja tendencyja na polskim rynku pracy ciapier — pryznačeńnie žančyn na tradycyjna mužčynskija pracoŭnyja miescy.
U McDonald's siarod persanału možna taksama sustreć i dziadul. U adnoj z restaracyjaŭ navat pracuje pensijaner, jakomu ŭžo kala 70. «Pracujučy siarod studentaŭ, dziadula znoŭ adčuvaje siabie maładym», — kaža pradstaŭnik McDonald's u Polščy.
