Prezident Siryi Bašar Asad paviedamiŭ hienieralnamu sakrataru AAN Pan Hi Munu, što siryjskaja armija spyniła siłavyja apieracyi suprać udzielnikaŭ antyŭradavych demanstracyj.
Jak paviedamiŭ aficyjny pradstaŭnik Abjadnanych Nacyj, u telefonnaj razmovie z Asadam hienieralny sakratar AAN zapatrabavaŭ, kab «usie vajennyja dziejańni i masavyja aryšty nieadkładna spynilisia».
Z sakavika hetaha hoda, kali ŭ Siryi pačalisia masavyja antyŭradavyja vystupy, siły biaśpieki zabili sotni demanstrantaŭ. U tym liku dla padaŭleńnia pratestaŭ prymianiajecca ciažkaja technika i navat artyleryja, ustalavanaja na vajennych karablach.
Apošniaja pa časie bujnaja apieracyja suprać demanstrantaŭ była praviedziena ŭ partovym horadzie Łatakija. U vyniku abstrełu siryjskich VMF i dziejańniaŭ vajennych niekalki čałaviek byli zabityja, kala 5 tys. palestynskich biežancaŭ byli vymušanyja pakinuć svaje łahiery.
Dziejańni siryjskaha režymu suprać demanstrantaŭ vyklikali rezkuju reakcyju mižnarodnaj supolnaści.
Svaich pasłoŭ z Damaska adklikali ŭrada Saudaŭskaj Aravii, Bachrejna i Kuviejta. Ministr zamiežnych spraŭ Turcyi nazvaŭ siłavoje padaŭleńnie akcyj pratestu niedapuščalnym.
ZŠA ŭ svaju čarhu ŭviali suprać Siryi sankcyi i zaklikali inšyja krainy rušyć uśled ich prykładu.
U adkaz na padziei ŭ krainie prezident Siryi Bašar Asad paabiacaŭ pravieści palityčnyja reformy, adnak padkreśliŭ, što jaho ŭrad praciahnie pieraśled «terarystyčnych hrup», jakija jon abvinavačvaje ŭ arhanizacyi demanstracyj.
Atrymać dakładnuju infarmacyju ab tym, što adbyvajecca ŭ Siryi niemahčyma, pakolki ŭłady krainy žorstka abmiažoŭvajuć pracu zamiežnych žurnalistaŭ.
