Ministerstva ekanomiki ličyć, što padstavy dla dalejšaha rostu cen zachoŭvajucca, zajaviŭ načalnik hałoŭnaha ŭpraŭleńnia makraekanamičnaha analizu i prahnazavańnia hetaha viedamstva Anton Dałhaviečny 26 žniŭnia na bryfinhu ŭ Minsku.
Adnym z asnoŭnych faktaraŭ, jaki viadzie da rostu cen, jon nazvaŭ množnaść kursaŭ biełaruskaha rubla. «Maje miesca množnaść kursaŭ, valutny rynak frahmientavany, i my realna nie viedajem kursu, pa jakim pravodziacca ździełki. Niama dakładnych aryjenciraŭ ni dla rynku, ni dla nas», — zajaviŭ Dałhaviečny.
Takaja situacyja, adznačyŭ jon, farmiruje značnyja inflacyjnyja čakańni. «Pa stanie na siaredzinu žniŭnia ceny vyraśli z pačatku hoda na 45,8% i daloka vyjšli za miežy prahnoznych paramietraŭ. My miarkujem, što rost spažyvieckich cen budzie praciahvacca», — skazaŭ načalnik hałoŭnaha ŭpraŭleńnia.
Jon taksama adznačyŭ, što situacyja z cenami da kanca hoda budzie šmat u čym zaležać ad stanovišča spraŭ na valutnym rynku — šmat «zaležyć ad kursavych aryjenciraŭ», jakija ŭstanoviacca.
Ciapier, paviedamiŭ pradstaŭnik Minekanomiki, urad i Nacyjanalny bank vypracoŭvajuć padychody pa vychadzie na adziny kurs. Pry hetym Anton Dałhaviečny padkreśliŭ: strymlivać ceny administracyjna ekanamična niemetazhodna. «Abmiežavańnie cen — nie źjaŭlajecca čymści dobrym. Cenavyja abmiežavańni zabivajuć mały biźnies», — patłumačyŭ jon.
Na dumku Dałhaviečnaha, źnižeńnia cen treba dasiahać za košt rynačnych miechanizmaŭ, a mienavita — kankurencyi.