«2 i 6 vieraśnia nas čakajuć dva vielmi ciažkija matčy, i ja nie viedaju, jaki ź ich budzie ciažejšym», — zajaviŭ hałoŭny trenier futbolnaj zbornaj Bośnii i Hiercahaviny Safiet Sušyč napres-kanfierencyi ŭ Minsku 1 vieraśnia.
«Jość mierkavańnie, što biełaruskaja zbornaja lepš hulaje ŭ haściach», — skazaŭ Sušyč.
Adkazvajučy na pytańnie, ci nie zrobiać drennuju pasłuhu zajavy baśnijskich futbalistaŭ pra pieravahu nad biełarusami, trenier zajaviŭ: «Našy hulcy aptymisty. Ja rady, što ŭ mianie ŭ kamandzie jość takija ludzi. U nas niamała hulcoŭ suśvietnaha ŭzroŭniu. Jany ličać, što źjaŭlajucca favarytami. Heta ich mierkavańnie. Ja vielmi pavažaju mierkavańnie svaich hulcoŭ. Ale ja vielmi pavažaju i kamandu, jakaja staić vyšej za nas. Heta nie vypadkovaść».
Pra pavahu da sapiernika zajaviŭ i kapitan baśnijcaŭ Emir Spachič, jaki razmaŭlaŭ ź biełaruskimi žurnalistami na ruskaj movie (u svoj čas jon vystupaŭ u jarasłaŭskim «Šyńniku», maskoŭskich kłubach «Tarpieda» i «Łakamatyŭ»). Jon adznačyŭ, što hulaŭ u Rasii ź niekalkimi futbalistami biełaruskaj zbornaj. «Vaša zbornaja vyjhrała niekalki važnych matčaŭ, — skazaŭ Spachič. — Nas i vas čakajuć dźvie vielmi cikavyja i vielmi ciažkija hulni». Pavodle słoŭ futbalista, dla dasiahnieńnia vyniku nieabchodna dyscyplinavanaść.
Pavodle mierkavańnia Safieta Sušyča, tolki taja kamanda, jakaja nabiare ŭ dvuchmatčavym supraćstajańni šeść ačkoŭ, atrymaje realny šans na druhoje miesca ŭ hrupie. Jon paviedamiŭ, što ŭsie futbalisty ŭ strai, i zajaviŭ, što
«nikoli nie było lepšaj zbornaj, čym ciapier».
«My pryjechali, kab pasprabavać vyjhrać, — skazaŭ trenier baśnijcaŭ. — Ja bačyŭ zajavu Štanhie (hałoŭny trenier biełaruskaj zbornaj. — BiełaPAN.), što jon žadaje trapić na čempijanat Jeŭropy. U mianie taja ž meta. Ź inšaha boku, my aptymisty, ale ničoha harantavać nielha».
