U bieraściejskim spartkompleksie «Viktoryja» zbornaja Biełarusi pa handbole siońnia raspačnie adboračny turnir da čempijanatu Eŭropy‑2008, što nastupnaj zimoj projdzie ŭ Narvehii. U pieršaj adboračnaj hrupie, dzie hulajuć biełarusy, dźvie pucioŭki ŭ płej‑of buduć razyhranyja ŭ adzin kruh. Supierniki našych — krepkaja zbornaja Słavaččyny dy handbolnyja eŭrakarliki – Kipr i Małdova. U tym, što kamanda Biełarusi projdzie ŭ nakaŭt‑raŭnd sumnivu niama, ale pažadana pieramahać i słavakaŭ, kab mieć lepšyja šancy ŭ losavańni.
Apošni raz mužčynskaja zbornaja Biełarusi ŭdzielničała ŭ top‑turnirach u 1994 h., kali na čempijanacie Eŭropy ŭ Partuhalii zaniała 8‑ie miesca. Ciaham nastupnych hadoŭ ajčynnaja handbolnaja škoła, jakaja była macniejšaj u 1980‑ch, rehresavała ŭ svaim raźvićci, skaciŭšysia da ŭzroŭniu «siaredniačkoŭ» eŭrapiejskaha handbołu.
Spadzievy na lepšaje ŭ hetym vidzie sportu źviazanyja... z prychodam da kiraŭnictva handbolnaj federacyjaj śpikiera Pałaty pradstaŭnikoŭ Uładzimiera Kanaplova. U handbolnych kołach spadziajucca, što Kanaploŭ dla raźvićcia handbołu zmoža vykarastać administracyjny resurs, jak heta zrabiŭ z chakiejem ministar unutranych spravaŭ Uładzimier Navumaŭ.
Na turniry ŭ Bieraści pad kiraŭnictvam Spartaka Miranoviča ŭ asnoŭnym buduć pradstaŭlać maładyja hulcy z nacyjanalnaha pieršynstva. Ź lehijaneraŭ pryjechali tolki Ivan Broŭka i Andrej Kurčaŭ ź Niamieččyny, Alaksiej Usik – z Švajcaryi, a taksama Siarhiej Ubožanka – z Aŭstryi. Za apošnija hady ceły šerah biełaruskich handbalistaŭ pamianiali hramadzianstva i ciapier vystupajuć za inšyja krainy. Tak, Siarhiej Rutenka na siońniašni momant źjaŭlajecca lideram słavienskaj zbornaj, Andrej Klimaviec – hulaje za zbornuju Niamieččyny, a Siarhiej Harbok nia tak daŭno pryniaŭ rasiejskaje hramadzianstva.
❏
Raskład hulniaŭ zbornaj Biełarusi na turniry ŭ Bieraści:
19 studzienia. Biełaruś – Małdova (pačatak a 19:00)
20 studzienia. Biełaruś – Kipr (17:00)
21 studzienia. Biełaruś – Słavaččyna (14:00).
Matčy pavinny tranślavacca na biełaruskich telekanałach.
