18 vieraśnia aktyvisty maładziovych arhanizacyjaŭ Mahilova praviali infarmacyjnuju akcyju «Pravaabaroncy suprać śmiarotnaha pakarańnia ŭ Biełarusi». Buklety, pryśviečanyja hetaj temie, jany razdavali minakam na praspekcie Puškina.
U akcyi ŭziali ŭdzieł dziasiatak aktyvistaŭ u sakołkach z nadpisam suprać śmiarotnaha pakarańnia. Pavodle adnaho z aktyvistaŭ, za piatnaccać chvilinaŭ jany razdavali bolej za trysta bukletaŭ.
«Siońnia mahiloŭskaja moładź dałučyłasia da kampanii «Pravaabaroncy suprać śmiarotnaha pakarańnia ŭ Biełarusi». My ličym, što žyćcio — heta absalutnaja kaštoŭnaść i dziaržava nia maje prava zabivać. Kali čałavieka karajuć na śmierć, to ŭ jaho niama bolej mahčymaściaŭ uśviadomić ździejśnienaje. Viedajučy našu sudovuju systemu, my nia ŭpeŭnienyja, što takija prysudy naahuł zakonnyja j spraviadlivyja», zajaviŭ adzin z udzielnikaŭ akcyi.
Incydentaŭ ź milicyjaj za čas praviadzieńnia akcyi nie było. Miesca, dzie pieršapačatkova jana planavałasia, moładziony źmianili. Piaciora milicyjantaŭ zastalisia «achoŭvać» placoŭku pierad handlovym centram «Prestan». Tym časam aktyvisty razdali buklety za piaćsot metraŭ adtul.
