25 lutaha ŭ KZ «Minsk» buduć abvieščany rok‑hieroi minułaha hodu. Rok‑karony atrymajuć pieramožcy kožnaj z 12 naminacyjaŭ, a taksama budzie nazvany ŭładalnik hałoŭnaj «Rok‑Karony».
Šmat kamu minułaja «Rok‑Karanacyja» zapomniłasia źjaŭleńniem u zali Milinkieviča i admovaj u suviazi z hetym «J‑Mors» vychodzić na scenu. Ale nia toje było hałoŭnaje. «Rok‑Karanacyja‑2005» stałasia kudy bolš maštabnym mierapryjemstvam, čym raniej. Asobnaja ŭvaha była skiravana na niestaličnyja hurty, a taksama na inšyja muzyčnyja płyni. Sioleta arhanizatary pajšli jašče dalej – na «Rok‑Karanacyi‑2006» źjaviacca niekalki novych naminacyjaŭ: adznačać lepšych u ciažkaj (metał i jaho adhalinavańni/chard‑rok), i ŭ pazytyŭnaj (ska/ska‑pank/rehi) muzycy, a taksama skirujuć uvahu na tych, chto pracuje ŭ lahčejšych płyniach (šanson, bardaŭskaja pieśnia, kabare). Znajšłosia miesca, jak dla repiera Kroŭa, tak i dla Piatra Jałfimava – jany naminujucca adpaviedna ŭ «Chip‑chop vykanaŭca hodu» i «Pop‑rok vykanaŭca hodu». Va ŭsich naminacyjach biaruć udzieł tolki tyja, chto ciaham minułaha hodu vydaŭ albom (usiaho takich vykanaŭcaŭ – la šaści dziesiatkaŭ). Ale hety kreter nie adziny: pry vybary ŭličvajecca taksama aktyŭnaja kancertnaja dziejnaść i stałasia prysutnaść vykanaŭcy ŭ infarmacyjnaj prastory ciaham hodu.
Jašče adno novaŭviadzieńnie – u kožnaj naminacyi svaja ekspertnaja rada. Tak pieramožcaŭ u tradycyjnych naminacyjach «Albom hodu» i «Prajekt hodu» vyznačać kiraŭniki ajčynnych łejbłaŭ i hukazapisvalnych kampanijaŭ. «Chit hodu» nazavie rada, składzienaja z pradstaŭnikoŭ drukavanych dy internet ŚMI, biełaruskaha «efemu» i televizii, za «Klip hodu» buduć hałasavać pradstaŭniki ajčynnych telekanałaŭ, z dapamohaj internet‑hałasavańnia budzie vyznačany «Vykanaŭca hodu». Usiaho skład žury sioleta naličvaje bolš za try dziesiatki ekspertaŭ – žurnalistaŭ i muzyčnych krytykaŭ, tele‑ i radyjoviadučych, muzykaŭ i pradusaraŭ, rok‑paetaŭ i menedžeraŭ.
Na samoj cyrymonii čakajecca prysutnaść i tych, chto nia vydaŭ dysk, ale pa‑svojmu adznačyŭsia ŭ 2006 hodzie. U liku takich muzykaŭ – laŭreaty «Basovišča» – «Parason» i «S.D.M.», pieramožcy «Rok‑Koła» – smalenski hurt «Deimos», jaki lepiej za ŭsich śpiavaje pieśni «Miascovaha času», mahiloŭski desant u vyhladzie hurtoŭ «Nevma», «Tav.Mauzer» i bluzmenaŭ z «White Night Blues». Darečy, «S.D.M.» i «Deimos» majuć uziać udzieł u hała‑kancercie finalistaŭ «Rok‑Koła», jaki projdzie ŭ Połacku na dzień raniej za «Karanacyju», a potym – na aŭtobus i ŭ Miensk.
Što da ŭsialakich «zabaronaŭ», to arhanizatary, jak i letaś, upeŭniena kažuć, što ŭsie, chto budzie adznačany ŭ naminacyjach – na scenu «kazy» vyjduć.
Poŭnaja infarmacyja pra «Rok‑Karanacyju‑2006» na sajcie hienieralnaha infarmacyjnaha sponsara cyrymonii – internet‑partału Tuzin hitoŭ.
❏
Rok‑Karanacyja‑2006. Asnoŭnyja naminacyi
Ciažkaja muzyka (metał i jaho adhalinavańni/chard‑rok)
Pazytyŭnaja muzyka
(ska/ska‑pank/rehi/art)
Lohkaja muzyka
(šanson, bardaŭskaja pieśnia, kabare)
Tradycyi i sučasnaść (etna/fołk/fołk‑rok/fołk‑madern/staradaŭniaja muzyka)
Rok‑muzyka
(rok/bluz/alternatyva)
Pop‑rok
Chip‑chop
Klip hodu
Albom hodu
Prajekt hodu
Chit hodu
Vykanaŭca hodu
Šerah specyjalnych naminacyjaŭ.
