Za minułyja vychadnyja biełaruskija pahraničniki spynili 18 sprobaŭ niezakonnaha vyvazu z krainy tytuniovaj pradukcyi.
Jak paviedamili ŭ pres-centry Dziaržaŭnaha pahraničnaha kamiteta, pałova zatrymańniaŭ kantrabandnaha tytuniu ŭ punktach propusku na rachunku kinołahaŭ smarhonskaj pahraničnaj hrupy i lidskaha pahranatrada. Z vykarystańniem słužbovych sabak vyjaŭlena 6 tajnikoŭ (u paliŭnym baku, bampierach, bahažniku, kabinie inšamarak) u aŭtamabilach, jakija nakiroŭvalisia ŭ Litvu. Usiaho da rašeńnia suda zatrymana 11 aŭtamabilaŭ koštam 377 młn. rubloŭ.
Zatrymlivali cyharety i na zialonaj miažy.
23 vieraśnia ŭ 2 hadziny nočy ad apieratyŭnaha dziažurnaha vilniuskaha atrada smarhonskim pahraničnikam pastupiła infarmacyja ab znachodžańni nieviadomych hramadzian za 50 mietraŭ ad linii
biełaruska-litoŭskaj miažy. Praz paŭhadziny apieratyŭnyja supracoŭniki bliz miažy znajšli aŭtamabil «Folksvahien» ź miechaničnymi paškodžańniami. Pry ahladzie inšamarki ŭ joj było znojdziena 20 karobak z cyharetami. Jak miarkujecca, vadziciel nie spraviŭsia z kiravańniem i, kinuŭšy tavar, uciok. Chutka litoŭskija kalehi paviedamili, što za 100 mietraŭ ad linii miažy na ich terytoryi znojdzieny 20 karobak z cyharetami, a taksama zatrymany šaściora litoŭskich hramadzian, jakija, mahčyma, datyčnyja da tytuniovaha pierakidvańnia.
Zaraz pravaachoŭnyja orhany vyśviatlajuć usie akaličnaści hetaha pravaparušeńnia.
U toj ža dzień zatrymali žadajučych zarabić niezakonnym sposabam i połackija pahraničniki. Try biełarusy i hramadzianin Litvy ŭ «Volva» pieravozili 6 tys. pačkaŭ biełaruskich cyharet, pryznačanych dla dalejšaha pierakidvańnia na sumiežny bok. Dva z zatrymanych akazalisia svajakami (maci i syn). Jak rastłumačyła žančyna, jana mieła namier dapamahčy synu.
Usia niezakonnaja tytuniovaja pradukcyja kanfiskavana.
BiełaPAN
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH