Da pajezdki ŭ Minsk 10 krasavika Dźmitryj Kanavałaŭ, hałoŭny padarozny ŭ vybuchu ŭ minskim mietro, amal sutki zdymaŭ kvateru ŭ Viciebsku. Heta stała viadoma z pakazańniaŭ śviedki, viciebskaha ryjełtara Taćciany Usavaj, jakaja zdała jamu kvateru. Pakazańni byli dadzieny sudu na pasiadžeńni 27 vieraśnia.
Pavodle słoŭ Usavaj, Kanavałaŭ zasialiŭsia ŭ pieršaj pałovie dnia 9 krasavika i syšoŭ prykładna ŭ 5.20 10 krasavika. Treba adznačyć, što pierajezd na zdymnuju kvateru moh być źviazany z daktyłaskapijavańniem Kanavałava 9 krasavika.
Usava pakazała, što pry zasialeńni pry Kanavałavie była vialikaja sumka. Jak miarkuje śviedka, u joj mahło znachodzicca śpirtnoje, što nie vitajecca ryjełtarami. Adnak Kanavałaŭ zapeŭniŭ jaje, što zdymaje kvateru tolki dla siabie. Mierkavańnie ab śpirtnym Usava zrabiła, bačačy jak aściarožna Kanavałaŭ pastaviŭ sumku, uvajšoŭšy ŭ kvateru. Pry hetym charakternaha zvonu, kali b u joj znachodzilisia butelki, jana nie pačuła.
