Čaku Bery, aŭtaru dvuch tuzinaŭ viečnazialonych chitoŭ, hitarnamu hieroju, jaki zrabiŭ hitaru hałoŭnym rok-instrumientam, trojčy kryminalniku i prosta adnamu z asnoŭnych muzykantaŭ XX stahodździa siońnia spoŭniłasia 85 hadoŭ.
Johnny B. Good — hitarysty pa ŭsim śviecie lubiać asacyjavać siabie z hetym piersanažam, jaki
«nie ŭmieŭ ni čytać, ni pisać, zatoje hraŭ na hitary».Drobna narezanaje soła ŭ pačatku pieśni adkryła dla rok-n-roła novuju realnaść — kali da hetaha rok-n-roł budavaŭsia na muzycy kantry, paskoranaj u niekalki razoŭ, to ciapier jahonaj asnovaj staŭ razhnany da chutkaści «forda-mustanha» rytm-n-bluz.
Za 85 hadoŭ, amal 60 ź jakich prajšli na scenie, u žyćci Čaka Bery było ŭsio: jon trojčy traplaŭ u turmu (to zapraŭku abrabuje, to padatki zabudziecca zapłacić), razahnaŭ ahromnistuju kolkaść hurtoŭ, niekalki razoŭ byŭ zabyty i niečakana «viartaŭsia ŭ najlepšaj formie».
Pra Čaka Bery chodzić vielizarnaja kolkaść lehiendaŭ — samaja papularnaja takaja: u kancy 50-ch, absalutna ŭsie hurty śpiavali jahonyja pieśni. Dyk voś Čak Bery, jaki bolš čym dziaŭčyn lubić tolki hrošy, jeździŭ na hastroli adzin.
U kožnym horadzie jon chucieńka znachodziŭ hurt, adyhryvaŭ ź imi kancert (a repiertuar Bery viedali ŭsie), i paśla niezaŭvažna razam z uisimi hrašyma vylataŭ u nastupny horad.
U pačatku 60-ch rok-n-rolščyki pačali źnikać z haryzontu:
Ełvis byŭ u vojsku, Litł Ryčard zaniaŭsia relihijnymi śpievami, Edzi Kokren i Badzi Choli zahinuli, a Čak Bery siadzieŭ u turmie.U hety čas da tvorčaści Čaka źviarnulisia maładyja brytanskija hurty, jakija amal adrazu stali suśvietna značnymi.
The Rolling Stones zapisali štuk 15 pieśniaŭ Bery(navat samym pieršym ich sinhłam była beryŭskaja Come On), The Beatles śpiavali nie mienš za dziesiać chitoŭ Čaka, astatnija anhličanie taksama nie adstavali.
U Bery da pačatku 70-ch prablem z papularnaściu nie było. Paśla pačalisia šykoŭnyja bluzavyja albomy, ale časy źmianilisia, i Čak pierastaŭ cikavić hramadskaść. Nu, nie toje kab zusim pierastaŭ, adnak z byłoj słavaj heta nie paraŭnać.
I raptoŭna ŭ 90-ja Kvencin
Tarancina ŭ svaim filmie «Kryminalnaje čytvo» vykarystoŭvaje stareńkuju pieśniu Čaka You Never Can Tell, pad jakuju tančać Uma Turman i Džon Travołta.I voś znoŭ Čak Bery apynuŭsia na vierchatury, dzie znachodzicca da siońniašniaha dnia.
Jon dahetul vystupaje. Kaniešnie pa scenie skača mienš, adnak śpiavaje ŭsio tyja samyja bieśśmiarotnyja pieśni: Johnny B. Good, Sweet Little Sixteen, Roll Over Beethoven, Rock-n-Roll Music, No Particular Place To Go, Carol, Let it Rock i astatnija chity.
Časam na kancertach jamu stanovicca drenna, adnak užo praź miesiac na jakim-niebudź zbornym kancercie jon źjaŭlajecca sa svajoj firmovaj hitaraj i novaj dziaŭčynaj.
