Na sieradu 2 listapada pryznačany sudovy praces pa spravie Alesia Bialackaha. Kryminalnuju spravu budzie vieści sud Pieršamajskaha rajona Minska (sudździa Siarhiej Bandarenka), adnak praces budzie prachodzić u budynku suda Maskoŭskaha rajona (praśpiekt haziety «Praŭda», 27). Pačatak — a
Budynak suda Maskoŭskaha rajona abrany miescam praviadzieńnia pracesu pa toj pryčynie, što Pieršamajski sud mieścicca ŭ starym budynku, dzie vielmi maleńkija zały sudovych pasiadžeńniaŭ.
* * *
Kali 4 žniŭnia da pravaabaroncy Alesia Bialackaha na płoščy Pieramohi padyšli asoby ŭ cyvilnym, jaho serca, napeŭna ž, joknuła. Jašče miesiac nazad, na pačatku lipienia jaho vyklikali ŭ padatkovyja orhany. Tady jamu i stała viadoma, što aficyjnyja instancyi Litvy vydali biełaruskim uładam usiu infarmacyju pra hrašovyja sumy, jakija jon atrymlivaŭ na svoj rachunak u bankach hetaj krainy. Jak pravaabaronca, Bialacki viedaŭ, što heta dastatkovaja padstava dla aryštu.
Tuju samuju infarmacyju dasłali i jašče na troch aktyvistaŭ ź likvidavanaha pravaabarončaha centra «Viasna».
Jak vynikaje sa słovaŭ kalehi Bialackaha, Valancina Stefanoviča, pravaabaroncy atrymlivali na rachunki hrošy, što ściakalisia z usiaho śvietu. Hetyja srodki išli na patreby represavanych i zvolnienych pa palityčnych matyvach. Sapraŭdy, viasnoŭcy za 15 hadoŭ dapamahli tysiačam ludziej.
Adkul biełaruskim uładam stała viadoma pra hetyja rachunki, pravaabaroncy nie ŭdakładniajuć. Ale možna mierkavać, što niejkaja infarmacyja trapiła ŭ KDB z kampjutaraŭ, skanfiskavanych u «viasnoŭcaŭ» u noč paśla vybaraŭ, z 19 na 20 śniežnia.
Hruntujučysia na tych źviestkach, i moh być aformleny zapyt u kampietentnyja litoŭskija i polskija orhany. Demakratyčnyja krainy spracavali jak pravavyja dziaržavy: jany dzielacca infarmacyjaj.
Namieśnik ministra justycyi Litvy Tomas Vajtkiavičus pryznaŭsia žurnalistam, što «infarmacyja pra bankaŭskija rachunki ŭ Litvie biełaruskich apazicyjnych arhanizacyj pradastaŭlena słužbam Biełarusi z pryčyny «zanadta vialikaha davieru da biełaruskich ustanovaŭ».
Ciapier litoŭskija i polskija čynoŭniki kusajuć łokci. «Palitviaźniaŭ nie pavinna być u Jeŭropie!» — skazaŭ Vajtkiavičus. U Litvie vakoł «zdrady», jak pišuć ŚMI, razhareŭsia vialiki skandał.
Stefanovič rascaniŭ dziejańni tych, chto pieradaŭ biełarusam infarmacyju jak «nieparazumieńnie, jakoje, adnak, doraha abydziecca biełarusam».
Na kvatery, leciščy i ofisie Bialackaha prajšli pieratrusy. Na majomaść nakładzieny aryšt.
Bialacki pryznany padazravanym pa kryminalnaj spravie, zaviedzienaj pa častcy 2 artykuła 243 Kryminalnaha kodeksa Biełarusi (uchileńnie ad vypłaty sum padatkaŭ, zboraŭ u asabliva bujnym pamiery). Maksimalnaje pakarańnie pa hetym artykule praduhledžvaje pazbaŭleńnie voli da siami hadoŭ z kanfiskacyjaj majomaści.
Try dziasiatki pravaabaroncaŭ i hramadskich dziejačoŭ z usiaho śvietu ŭtvaryli Arhkamitet pa vyłučeńni Alesia Bialackaha na Nobieleŭskuju premiju miru.
* * *
Biełaruskija ambasady ŭ mnohich krainach admaŭlajuć u vizach pradstaŭnikam mižnarodnych hramadskich i pravaabarončych arhanizacyj, jaki vykazali žadańnie patrapić na sud Bialackaha.
Ambasada ŭ Paryžy admoviłasia vydać vizu prezidentu Mižnarodnaj fiederacyi pravoŭ čałavieka (FIDH) Suchajr Biełchasen, spasłaŭšysia na niepažadanaść jaje prysutnaści ŭ Minsku.
Piersonami non grata dla biełaruskich uładaŭ stali taksama kiraŭnica prahram prvaabarončaj arhanizacyi «Sivil Right Defenders» sa Šviecyi Mary Miensan, pravaabaroncy z Narviehii Ane Bonde i Dajve Pietkiavičute, jakija pradstaŭlajuć Fond Damoŭ pravoŭ čałavieka.
Biełaruskaja ambasada taksama admoviła ŭ vydačy vizy pradstaŭnicy Narviežskaha Chielsinskaha kamiteta Beryt Lindeman. Pry hetym napiaredadni joj paviedamili pa telefonie, što viza hatovaja i jaje možna zabrać u luby čas.
Akramia hetaha, tolki što stała viadoma ab admovie ŭ vizie pravaabaroncy Maryjanie Roča z Partnership for Human Rights (Bielhija), jakaja taksama źbirałasia padtrymać kalehu na sudzie.
