Chadž da śviatych miescaŭ isłamu ŭ Miecy i Miedynie aficyjna pačynajecca siońnia ŭ Saudaŭskaj Aravii.Heta adzin z asnoŭnych abaviazkaŭ musulmanina, jaki harantuje jamu adpuščeńnie hrachoŭ i dasiahnieńnie viečnaha ščaścia ŭ zamahilnym žyćci. Kožny pravavierny, pavodle isłamu, abaviazany choć raz u žyćci ździejśnić chadž.
Sioleta saudaŭskija ŭłady aficyjna abviaścili, što nie dapuściać u krainu nikoha bieź śpiecyjalnych dazvołaŭ. Upieršyniu takija piśmova zadakumientavanyja dazvoły na chadž, u tym liku i dla paddanych karaleŭstva, byli ŭviedzienyja try hady tamu, i z tych časoŭ saudaŭskija siły biaśpieki stroha sočać za vykanańniem hetaj normy, praviarajučy ŭsich, chto ŭjazdžaje ŭ Miekku.
Z hetaha hoda ŭviedzienyja i niekatoryja inšyja abmiežavańni. Tak, viernikam zabaroniena kuryć na terytoryi śviatyń, parušalnikam pahražaje bujny štraf. Zabaroniena taksama ŭ metach ekanomii spać na padłozie. Jak zajavili pradstaŭniki isłamskaha duchavienstva karaleŭstva, «isłam pakłapaciŭsia ab fizičnym i finansavym dabrabycie pałomnikaŭ, ich biaśpiecy, pałomnictva spałučanaje z ryzykami i niazručnaściami, ale pry hetym kožny musulmanin abaviazany vykonvać instrukcyi, vydadzienyja kampietentnymi orhanami, skiravanymi na zachavańnie poŭnaj biaśpieki» ŭdzielnikaŭ chadžu.
Jak čakajecca, pałomnictva sioleta ździejśniać bolš za 2 miljony musulman z usiaho śvietu. Kožnaja kraina atrymlivaje peŭnuju kvotu. Pieršyja pałomniki pačali prybyvać u Saudaŭskuju Araviju za tydni, kab zahadzia padrychtavacca da vykanańnia abradaŭ. Ułady krainy pryznalisia, što košt pajezdki na chadž u karaleŭstva sioleta istotna vyras, u tym liku i pa vinie kampanij, jakija arhanizujuć hetyja pajezdki.
