Karespandent polskaj «Haziety Vyborčaj» Andrej Pačobut atrymaŭ premiju Andžeja Vajcechoŭskaha. Hetaja premija zasnavana polskim «Radyjo Z», a ŭ vybary naminantaŭ i pieramožcaŭ udzielničajuć taksama redaktary najbujniejšych i viadučych ŚMI Polščy: haziet, radyjostancyj i telekanałaŭ.
Jak skazaŭ Pačobut, jaho adznačyli premijaj za artykuły ab prezidenckich vybarach 2010 hoda. Premija składaje 50 tysiač złotych (krychu bolš za 15 tysiač dołaraŭ).
Andrej Pačobut nie zmoh asabista atrymać hetuju premiju. Jon asudžany na try hady pazbaŭleńnia voli z adterminoŭkaj na dva hady pa artykule «paklop ŭ dačynieńni da prezidenta», jamu zabaronieny vyjezd za miažu. «Premiju za mianie atrymała maja žonka, jakaja vyjechała dla hetaha ŭ Polšču. Mnie telefanavali z Polščy, i ja razmaŭlaŭ z tymi, chto mnie ŭručaŭ premiju», — skazaŭ Pačobut.
«Vielmi pryjemna, kali tvaja praca aceńvajecca nie prosta tymi ludźmi, jakija majuć dačynieńnie da žurnalistyki, a tymi, čyje artykuły ty čytaŭ, u kaho vučyŭsia i dziakujučy jakim staŭ žurnalistam», — dadaŭ Pačobut.
Jon źbirajecca zadekłaravać atrymanuju premiju. «Z hetaj premii ja maju namier zapłacić padatki, i zapłaču ich», — zajaviŭ žurnalist.
Nahadajem, 5 lipienia sud pryznaŭ žurnalista vinavatym pa častcy 1 artykuła 367 (paklop u dačynieńni da prezidenta) Kryminalnaha kodeksa za šerah artykułaŭ z krytykaj dziejnaj ułady. Pačobuta pryhavaryli da troch hadoŭ pazbaŭleńnia voli z adterminoŭkaj na dva hady. Sudovy praces byŭ zakrytym.
