Rada Jeŭropy asudžaje prysud, vyniesieny 24 listapada biełaruskamu pravaabaroncu Alesiu Bialackamu. Pra heta havorycca ŭ zajavie hienieralnaha sakratara arhanizacyi Turbjerna Jahłanda.
«Ja rašuča asudžaju surovy pryhavor pravaabaroncu Alesiu Bialackamu, vyniesieny nibyta za ŭchileńnie ad vypłaty padatkaŭ, — skazaŭ Jahłand. — Staŭleńnie da Bialackaha źjaŭlajecca jarkim prykładam pieraśledu ŭładami arhanizacyj hramadzianskaj supolnaści, asabliva paśla prezidenckich vybaraŭ 19 śniežnia 2010 hoda».
Jahłand padkreśliŭ, što Bialacki pavinien być «vyzvaleny biez usiakich umoŭ, jak i ŭsie inšyja palitźniavolenyja». Akramia taho, adznačyŭ hienieralny sakratar Rady Jeŭropy, nie pavinna być pieraškod dla dalejšaj dziejnaści Bialackaha pa abaronie pravoŭ čałavieka ŭ Biełarusi.
Vyzvalić Bialackaha zaklikali Vialikabrytanija, Hiermanija, PASIE, ABSIE, Jeŭraparłamient, Mižnarodnaja fiederacyja pravoŭ čałavieka dy inš.
* * *
Ministr zamiežnych spraŭ Litvy Aŭdronius Ažubalis siońnia asudziŭ prysud Bialackamu i zajaviŭ, što jon vyłučyć Alesia Bialackaha na Nobieleŭskuju premiju miru. Heta vielmi važnaja zajava, jakaja pavialičyć šancy Bialackaha na atrymańnie hetaj važnaj premii.
* * *
Aleś Bialacki —
Bialacki pryznany vinavatym pa častcy 2 artykuła 243 Kryminalnaha kodeksa (utojvańnie dachodaŭ u asabliva bujnym pamiery). U chodzie suda pravaabaronca patłumačyŭ, što adkryŭ bankaŭskija rachunki za miažoj, bo zrabić heta ŭ Biełarusi nie ŭjaŭlałasia mahčymym. Pravaabarončy centr «Viasna», jaki jon uznačalvaje, byŭ zakryty ŭładami ŭ 2003 hodzie, a na šmatlikija sproby pravaabaroncaŭ lehalizavać svaju arhanizacyju Miniust adkazvaŭ admovaj. Hrošy, jakija pieraličvalisia na rachunki Bialackaha, vykarystoŭvalisia dla akazańnia dapamohi achviaram palityčnych represij u Biełarusi.
