ZŠA, 2011, kalarovy, 90 chv, 3D
Režysior: Krys Miler
Žanr: Animacyjnyja kazačnyja pryhody
Adznaka: 5,5 (z 10)
Kot u botach paluje za čaroŭnymi fasolami, kab zabracca na abłoki — i skraści adtul husku, jakaja niasie załatyja jajki. Hieroj musić abjadnać svaje vysiłki z chitrym Šałtajem-Bałtajem i złodziejkaj Kisaj. Ale nie ŭsio tak prosta, jak zdajecca…
Pośpiech zialonaha «Šreka», jaki pieražyŭ try premjery, mnohim nie davaŭ spać.
Charyzmatyčny rudy kocik, jaki składaŭ kampaniju Šreku, dačakaŭsia svajho bieniefisu pad pilnym dahladam halivudzkich pradusaraŭ.Ale sioletniaja stužka anijak nie źviazanaja z paciešnymi ohrami j Trydziaviataj krainaj. U filmie — dziacinstva Kata ŭ botach i jahony šlach da sučasnaje słavy.
Puchnaty kaciara prajšoŭ praź siroctva i padletkavyja kradziažy, pasiabravaŭ z Šałtajem-Alaksandram Bałtajem, maryŭ, ździajśniaŭ hierojstvy, sutyknuŭsia z padmanam. U filmie — hišpanskija miełodyi j śpiakotnaja pustynia, drapiežnyja jezdavyja dziki j prydurkavatyja razbojniki, maleńkaja «załataja» huska i jejnaja vuścišnaja matula. Ale my nie pačujem aryhinalnaha hołasu Antonia Banderasa — animacyja dublažujecca ŭ Rasiei.
Stvaralniki stužki hrajuć z vesternami, muzyčnymi filmami, hanhsterhskim kino, mieładramaju — i paciašajuć nas žartami (paračka ź jakich — pluhija). Ale stužka nastolki pradumanaja, što amal miechaničnaja.
Zamiłavańnie ad firmovych kacinych vačej — burnaje, z zachlipami, ale dziejničaje pa zvyčcy;žartam nad kazačnymi piersanažami ŭžo 10 hadoŭ (pa kacinamu vieku — usie 100).
Ale miechaničnaść ažyŭlenych kocikaŭ amal nichto nie zaŭvažyć. Da taho ž puchnaty razbojnik tak łakaje małačko ŭ sałunie j paluje za soniečnym zajčykam, što možna daravać filmu staraść.
