Kolkaść mužčyn, jakija znachodziacca na ŭliku ŭ narkadyspansiery, źnižajecca, a žančyn i padletkaŭ — uzrastaje. Hetaja tendencyja aktualna jak dla Biełarusi, tak i dla krain Jeŭropy,paviedamiŭ hałoŭny narkołah Ministerstva achovy zdaroŭja Siarhiej Osipčyk na pasiadžeńni kruhłaha stała pa abmierkavańni stratehii ŭmacavańnia zdaroŭja dziaciej i maładych ludziej hrup ryzyki 30 listapada ŭ Minsku.
«Padletkam zaŭsiody chočacca pasprabavać štości novaje. I heta cudoŭna. Ale heta nie pavinna tyčycca psichaaktyŭnych rečyvaŭ. Ałkahol u lubym vyhladzie nie pierastaje być ałkaholem — nie važna, słabaałkaholny napoj ci mocny», — adznačyŭ Osipčyk.
Pavodle źviestak hałoŭnaha piedyjatra Ministerstva achovy zdaroŭja Aleny Niaviery, dziciačaja achova zdaroŭja ŭ Biełarusi za apošni čas damahłasia istotnych pośpiechaŭ. «Źnižeńnie pakazčykaŭ usich kaeficyjentaŭ śmiarotnaści novanarodžanych i śmiarotnaści dziaciej da 5 i da 17 hadoŭ, vysoki ŭzrovień imunizacyi dziciačaha nasielnictva, stabilizacyja zachvorvańnia i źnižeńnie infiekcyjnaha zachvorvańnia — asnoŭnyja dasiahnieńni na hety momant», — paviedamiła jana.
Adnak, pavodle słoŭ Niaviery, kolkaść dziciačaha nasielnictva da 14 hadoŭ u Biełarusi za apošnija 40 hadoŭ pamienšyłasia na 40%, a za apošnija piać hadoŭ kolkaść dziaciej da 17 hadoŭ źniziłasia amal na čverć.
«Našy stanoŭčyja dasiahnieńni, asabliva ŭdaskanalvańnie technałohij, źviazanych z praciaham žyćcia, pryviali da źmienaŭ u struktury dziciačaha zachvorvańnia i invalidnaści i zapatrabavali intensiŭnaha raźvićcia mietadaŭ reabilitacyi. Hetym my i budziem zajmacca najbližejšym časam», — adznačyła hałoŭny piedyjatr Ministerstva achovy zdaroŭja.
