«Lapis Trubiackoj» ładzić u Maskvie kancert-akcyju «Novy hod pa-biełarusku».
U noč z 31 śniežnia na 1 studzienia hurt «Lapis Trubiackoj» vyrašyŭ zładzić kancert-akcyju «Novy hod pa-biełarusku». Akrom ułasna kamandy Siarhieja Michałka, jakaja vykanaje pieśni z svajoj prahramy «Hraj», u navahodniuju noč vystupiać jašče šerah biełaruskich vykanaŭcaŭ. Impreza projdzie ŭ vialikim maskoŭskim kłubie P!PL i budzie pryśviečana «ŭsim biełarusam i spačuvajučym». Dres-kod na viečarynu ŭviedzieny zabaŭny — vusy. «My ŭsie raścim vusy. Chočam zabrać hety symbal sabie», — kaža pradusar «Lapisaŭ» Jaŭhien Kałmykoŭ.
«Spačatku dumali ŭ siamiejnym kole adznačyć, a potym vyrašyli zrabić vialiki rok-kancert na Novy hod», — kaža Kałmykoŭ. Dla hetych metaŭ muzyki biaruć vialiki rok-kłub u Maskvie P!PL, jaki źmiaščaje da 2000 čałaviek. Tut u noč z 31 śniežnia na 1 studzienia «Lapisy» zajhrajuć svaju prahramu «Hraj». Razam ź imi na scenu vyjduć Lavon Volski solna i z prajektam «Krambambula», hurt Pomidor/off, a taksama DJ Papa Bo. Akcyju vyrašana nazvać «Novy hod pa-biełarusku» dy ŭvieści dres-kod — vusy.
«My ŭsie rościm vusy. Chočam zabrać hety symbal sabie. Tamu prosim usich našych haściej taksama adraścić vusy da Novaha hoda. Lavon, voś, paabiacaŭ, naprykład», — uśmichajecca Jaŭhien Kałmykoŭ. Na pryznańnie pradusara, «Lapis Trubiackoj» ź vialikim zadavalnieńniem zrabiŭ by padobny kancert u Minsku, ale ź viadomych pryčyn heta niemahčyma. U tak zvanym «čornym śpisie» razam z «Lapisami» znachodzicca taksama hurt «Krambambula». «Ale ja peŭny, što kali-niebudź my adznačym Novy hod vialikim kancertam u Minsku», — dadaje Jaŭhien.
Cikava, što «Lapis Trubiackoj» užo sustrakaŭ Novy hod na scenie. 31 śniežnia 2009 hodu muzyki davali vialiki kancert u maskoŭskim kłubie IKRA.
