U Varšavie prachodzić tradycyjnaja kanfierencyja «Biełaruś i biełarusy siarod susiedziaŭ: histaryčnyja stereatypy i palityčnyja kanstrukty», što ładzicca pry Instytucie hramadzianskaj prastory i publičnaj palityki Univiersiteta imia Łazarskaha. Na joj mieŭ vystup lidar Ruchu «Za Svabodu» Alaksandr Milinkievič.
Palityk skancentravaŭsia ŭ pramovie na pytańni, chto vyjhraje Biełaruś u budučyni? «Ja vieru, što my vyjhrajem. My vierniemsia tudy, adkul pachodzim», — adznačyŭ Milinkievič, majučy na ŭvazie Jeŭropu.
Były kandydat u prezidenty zrabiŭ nievialiki ŭ ekskurs u historyju, jak mianiałasia palityka Jeŭrasajuza adnosna Biełarusi.
«Palityka sankcyj, izalacyi była maralnaj. Ale palityka tady palityka, a nie pazicyja, kali daje vyniki. Situacyja ž u krainie tolki horšała, bolšaŭ strach, stanaviłasia bolš palitviaźniaŭ».
Kropkaj adliku novaj palityki dyjałohu ES Milinkievič ličyć pryjezd u Minsk jeŭrakamisara Chaŭjera Sałany. «Była sprečka, ci možna razmaŭlać z dyktataram. Možna, kali havorka idzie pra narod. Chacia hety dyjałoh daŭ 19 śniežnia. Nichto nie staviŭ za metu demakratyzavać Łukašenku. Była meta paviarnuć narod da Jeŭropy».
Pa słovach Milinkieviča, navat tyja nievialikija sastupki, na jakija išła ŭłada padčas «libieralizacyi» adyhryvali važnuju rolu na budučyni. Hałoŭnaj pamyłkaj Jeŭropy jon nazyvaje adsutnaść darožnaj karty ŭ adnosinach ES i Biełarusi.
«Pavinny byli być kankretnyja kroki z boku ŭładaŭ, na jakija musić adkazvać Jeŭrasajuz. Łukašenka ž ničoha nie rabiŭ, a Jeŭropa čakała. Ja praciŭnik taho, kab Łukašenku davali hrošy. Hetyja hrošy pojduć na režym. Dyjałoh pavinien uznavicca tolki paśla vyzvaleńnia palitviaźniaŭ. Kali chočacie, nie budzie dyjałohu — nie budzie Biełarusi», — miarkuje Milinkievič.Palityk nazyvaje prajekt Jeŭrazijskaha sajuza «metaj žyćcia Pucina». «Bierlinski mur», što siońnia isnuje pamiž Biełaruśsiu i Jeŭropaj, tolki na karyść Rasii. Ja amal upeŭnieny, što paśla abrańnia Pucina prezidentam Rasija pasprabuje zamianić Łukašenku na bolš łajalnaha i pradkazalnaha čałavieka, jaki budzie zdavać ekanomiku i, nie daj Boh, uviadzie rasijski rubiel».
Milinkievič ličyć, što ŭ 2008 jakraz palityka dyjałohu, a nie sankcyj pryviała da vyzvaleńnia palitviaźniaŭ. «Dyjałoh vyzvaliŭ viaźniaŭ, a nie amierykanskija sankcyi. Sankcyi šturchajuć nas da Rasii. Dyjałoh značna bolš efiektyŭny».
Była zakranutaja i tema abjadnańnia apazicyi, jakaja niaredka stavicca na Zachadzie. «Ja za abjadnańnie. Ale navat polskaj «Salidarnaści» było lahčej, bo ŭsie ad samych levych da samych pravych byli za addaleńnie Polščy ad Rasii i nabližeńnie da Jeŭropy.
U nas ža navat siarod apazicyi jość siły, što vystupajuć za intehracyju z Rasijaj i dobrasusiedskija dačynieńni ź Jeŭropaj. Ja i maje prychilniki za intehracyju ź Jeŭropaj i dobrasusiedstva z Rasijaj».
Lidar Ruchu «Za Svabodu» miarkuje, što na siońniašni dzień Rasija maje bolš šancaŭ adchilić Łukašenku ad ułady, čym apazicyja. «Vyrašalnymi ŭ pytańni, kudy pojdzie naša kraina, buduć pieršyja vybary paśla Łukašenki», — ličyć A.Milinkievič.
