Svajaki palitviaźniaŭ prosiać dapamohi ŭ śviataroŭ i pastaraŭ 13

Svajaki palitźniavolenych źviarnulisia da kiraŭnikoŭ asnoŭnych chryścijanskich kanfiesij. Da Patryjaršaha ekzarcha ŭsiaje Biełarusi, Mitrapalita Minskaha i Słuckaha Fiłareta, Apostalskaha Nuncyja ŭ Biełarusi arcybiskupa Kłaŭdyjo Hudžeroci, Arcybiskupa Minska-Mahiloŭskaha, Mitrapalita Tadevuša Kandrusieviča, archimandryta Siarhieja Hajeka, biskupa Siarhieja Chomiča, Majsieja Astroŭskaha, Viačasłava Hančarenki i Leanida Biruka.

«Šanoŭnyja Ajcy-Pastary! My, matuli, žonki, niaviesty ludziej, jakija byli zatrymanyja, źbityja i biespadstaŭna asudžanyja paśla vybaraŭ 2010, ci patrapili za kraty ŭžo ŭ 2011 — Andreja Sańnikava, Mikałaja Statkieviča, Źmitra Bandarenki, Paŭła Sieviarynca, Źmitra Daškieviča, Eduarda Łobava, Alesia Bialackaha, źviartajemsia ŭ hety śvietły čas Božaha Naradžeńnia da Vas, Šanoŭnyja Pastary, z zaklikam ab dapamozie: paspryjajcie, kali łaska, chutkamu vyzvaleńniu našych lubych blizkich.

Našyja syny, mužy i žanichi — vydatnyja, mužnyja ludzi Biełarusi: dypłamaty, piśmieńniki, hramadskija dziejačy, pravaabaroncy, ščyryja vierniki i pravyja ludzi. Jany lubiać našu krainu i ludziej, i nie zasłuhoŭvajuć, kab ciapier pakutavać u turmach.

Śviata Božaha Naradžeńnia — heta Śviata siamiejnaje, i nam, jak usim zvyčajnym ludziam, chaciełasia b jaho pravieści doma z našymi blizkimi.

Prajšoŭ užo hod, jak jany ŭ viaźnicy. Dla nas jon staŭsia kryžovym šlacham pakutaŭ i ciarpieńniaŭ. Mnohija z nas sami prajšli praz aryšty, sudy i turmu ŭ abaronu svaich mužoŭ i synoŭ; my nie kažam ŭžo pra bol, ślozy, nievyspanyja nočy. Mała taho, što jany niespraviadliva asudžanyja i znachodziacca ŭ źniavoleńni, na ich akazvajecca pastajanny cisk: fizičny, duchovy i maralny. Źmicier Daškievič za hety čas straciŭ maci, pieražyŭ niekalki ciažkich etapaŭ i ciapier z-za pahrozy svajmu žyćciu adbyvaje pakarańnie ŭ kamiery-adzinočcy, jak i Andrej Sańnikaŭ. Ad Andreja Sańnikava ŭžo druhi miesiac niama faktyčna nijakich źviestak, da jaho nie moža patrapić ni žonka, ni advakat. Paśla ŭstupleńnia prysudu ŭ siłu jon pieražyŭ užo dva etapy, źmianiŭ try viaźnicy. Mikoła Statkievič u kamiery čakaje čarhovaha sudu — jamu pahražaje pieravod u turmu. Źmicier Bandarenka — chvory, patrabuje nieadkładnaj miedyčnaj dapamohi, bo inakš moža stacca invalidam. A Baćka Alesia Bialackaha ciapier na miažy žyćcia i śmierci z-za raku lohkich. Jość jašče inšyja źniavolenyja, jakija adbyvajuć sroki pa palityčnym matyvam, takija jak Mikoła Aŭtuchovič, Jaŭhien Vaśkovič, Alinievič Ihar i inšyja.

My prajšli faktyčna ŭsie biełaruskija sudovyja instancyi, zrabili ŭsio, što było ŭ našych, čałaviečych siłach, ale marna. Ciapier my spadziajemsia na Boha i Jaho Łasku, Miłasernaść i Cud. Vierym, što Boh dziejničaje praź ludziej. I zaraz usie my čakajem cuda Božaj Spraviadlivaści i Vašaha dziejańnia!

Siońnia my, žančyny, prosim dapamohi tych, chto moh by abaranić nas i našyja siemji. Viedajem, što Vy sustrakajeciesia z kiraŭnikom dziaržavy, razumiejem, što Vy paklikany prapaviedavać Jevanhielle mocnym hetaha śvietu. «Duch Haspodni na Mnie; bo Jon pamazaŭ Mianie źviestavać ubohim i pasłaŭ Mianie acalać złamanych sercam, prapaviedavać pałonnym vyzvaleńnie, ślapym prazreńnie, adpuścić spakutavanych na svabodu, abviaščać hod Haspodniaha spryjańnia." Łuki 4:18–19.

Kali łaska, stańcie pobač z nami, padzialicie naš bol i zastupiciesia za nas!

Budziem vielmi ŭdziačnyja Vam. Niachaj Boh dabrasłavić Vas u hetaj słušnaj spravie. Nie bojciesia!

Z pavahaju i malitvaju, Nasta Pałažanka, Ała Sańnikava, Maryna Adamovič, Taćciana Sieviaryniec, Volha Bandarenka, Natalla Pinčuk, Maryna Łobava.