21‑hadovy student 4‑ha kursa BDUIRa Siaržuk Miadźviedzieŭ skončyŭ na hetym tydni pierakład na biełaruskuju movu kultavaha ramana amerykanskaha piśmieńnika Čaka Pałaniuka (Chuck Palahnuk) «Bajcoŭski klub». Nad pierakładam tvoru Siaržuk pracavaŭ paŭtara hodu. Ciapier ciaham dvuch miesiacaŭ jon miarkuje šlifavać pierakład.
U toj samy dzień, jak Miadźviedzieŭ skončyŭ pracu nad pierakładam, jon atrymaŭ list ad samoha Čaka Pałachniuka. «Adčyniaju paštovuju skryniu, a adtul vylataje papierčyna: «Na vaša imia atrymana pasyłka z ZŠA, ‑‑ raskazvaje Siaržuk Miadźviedzieŭ. – Skončyć pracu nad pierakładam i atrymać u adzin dzień pasyłku ad Pałaniuka!. U pačatku kastryčnika pabačyŭ abviestku: Čak Pałaniuk adčyniaje paštovaje vakno dla fanataŭ. Treba było dasłać list na adras jaho menedžera, i piśmieńnik adkaža asabista kožnamu listom abo pasyłkaj. Ja napisaŭ, jak ščyry fanat, słovy zachapleńnia, adznačyŭ, što pierakładaju «Bajcoŭski klub», jak składana było dastać aryhinał, jak ciažka ŭ nas z rodnaj movaj, paprasiŭ dasłać paru knih. Ja nie spadziavaŭsia na adkaz, pahatoŭ na pasyłku. Usiaredzinie pasyłki byŭ list i štuk 15 roznych drobiaziej ‑‑ cacačnaja morkva a la kinder‑siurpryz, kalkulatar, plastmasavy adrezany palec, kaladnyja śviečki, nasieńnie niezabudki, dva aŭdyjodyski ź jahonymi čytańniami padčas knižnych turaŭ, a taksama žyvioła, jakaja symbalizuje maju moc: maleńki plušavy miadźviedzik. Pałaniuk sam u liście markieram napisaŭ: «Your Power Animal is enclosed!!!» Pryjemna. A list — try maleńkija abzacy — Pałaniuk napisaŭ asabista. Daŭ paru karysnych paradaŭ pa žyćci».
***
Siaržuk Miadźviedzieŭ naradziŭsia ŭ 1985 h. u Viciebsku. Źjaŭlajecca navučencam Biełaruskaha kalihijumu, zajmajecca ŭ «Pierakładnoj majsterni» Chadanoviča . Letaś staŭ pieramožcam litaraturnaha konkursu da 100‑hodździa «Našaj Nivy». Ciapier źbirajecca šukać vydaŭca.
U 2001 h. uryvak z «Bajcoŭskaha klubu» ŭ pierakładzie Volhi Hapiejevaj drukavała hazeta «Naša Niva».
Uryvak z «Bajcoŭskaha klubu» ŭ pierakładzie Sieržuka Miadźviedzieva
