RIETIE RAFF prezientuje svoj novy albom «Pahłybleńnie». Z hetaj nahody 28 lutaha ŭ małoj zali Pałaca Respubliki muzyki daduć vialiki kancert.
— Heta budzie sapraŭdnaje šou, — abiacaje lider hurta Pit Paŭłaŭ. — Usich sakretaŭ pakul nie raskažam. Adnak abiacajem pradstavić na scenie pašyrany skład hurta — bolš za dziesiać muzykaŭ adnačasova. Buduć tančyć i pryhožyja dziaŭčaty, i šmat jašče čaho cikavaha.
Darečy, što da dziaŭčat, to zusim nie vyklučana, što ŭ kancercie prymie ŭdzieł i Alaksandra Kirsanava z dueta «Alaksandra i Kanstancin». Hołas śpiavački jość i ŭ adnoj ź piesień alboma. Praŭda, Alaksandry z usioj pieśni dastałasia tolki karacieńkaje hałašeńnie, ale heta i nie hałoŭnaje, jak pryznaŭsia Pit Paŭłaŭ, jamu prosta pryjemna było zaprasić da siabie hetuju dziaŭčynu.
Što ž da źmiestavaj napoŭnienaści alboma, to, kali vieryć muzykam, jany ździejśnili sprobu «adaptavać biełaruskuju narodnuju muzyku da sučasnaha hučańnia». Tradycyjnyja narodnyja matyvy ŭ sučasnych aranžyroŭkach, aŭtentyčnyja instrumienty, staražytnyja ŭ pieramiešku z aŭtarskimi teksty — voś prykładna taki źmiest alboma, praca nad jakim doŭžyłasia try hady.
— Takoha ŭ sučasnaj muzycy jašče nie było, — z upeŭnienaściu śćviardžaje Pit Paŭłaŭ. — Kaniešnie, niekatoryja muzyčnyja kalektyvy rabili ŭ hetym kirunku peŭnyja sproby, ale heta jany pieraniali ŭ nas. Nazyvać «płahijataraŭ» nie budu. Navošta? Budziem ličyć, što jany nie płahijatary, a paśladoŭniki. Dla nas ža ŭ svaju čarhu nastaŭnikami byli «Troica» i «Pałac».
Muzyka, što hučyć ŭ albomie, narodnaja tolki pa naźvie. Na 60‑70% jana ŭsio ž aŭtarskaja: niekatoryja pieśni byli dapisany, niekatoryja pierapisany, jość i zusim novyja. A voś teksty traplajucca časam vielmi staražytnyja. Naprykład, adzin ź ich byŭ znojdzieny ŭ Aktavaj knizie kanca XVI stahodździa. Jašče dva, znojdzienych padčas falkłornaj ekśpiedycyi, datujucca pačatkam XVII stahodździa.
Ščyra kažučy, dysk atrymaŭsia nie tanny — u kramie jon kaštuje nie mieniej za 27 tysiač rubloŭ. Mahčyma, usia pryčyna u vokładcy, jakaja, pa słovach muzykaŭ, była zroblena z kardonu, pryčym nie zvyčajnaha, a elektratechničnaha. Jak pryznaŭsia Pit Paŭłaŭ, hetym kardonam možna navat izalavać transfarmatary. Što ž da estetyčnych asablivaściaŭ vokładki, to ideju jaje azdableńnia prapanavała mastačka Zoja Łucevič, uvasableńnie ž naležyć viadomamu hrafiku i dyzajnieru Adreju Basałyhu. Tyja ž, kamu taki dysk pakul nie pa kišeni, mohuć pačakać i bolš demakratyčnaha varyjantu — muzyki abiacajuć u bližejšy čas vydać tańniejšuju viersiju dyska (na žal, izalavać transfarmatary jaho vokładkaj budzie ŭžo niemahčyma).
Prezientacyja novaha alboma RIETIE RAFF «Pahłybleńnie» płanujecca na apošni dzień zimy — 28 lutaha. Usim, chto pryjdzie na kancert, muzyki harantujuć mocny zarad viasnovaha nastroju.
