U najbližejšyja paŭhoda pasolstva Polščy ŭ Minsku budzie pracavać na raniejšym miescy.
U najbližejšyja paŭhoda pasolstva Polščy ŭ Biełarusi budzie pracavać na raniejšym miescy pa adrasie Rumiancava, 6. Jak paviedamiŭ BiełaPAN pres-sakratar polskaj dypmisii Pavieł Marčuk, dahavor arendy budynka, jaki zakančvaŭsia 31 studzienia, pradoŭžany jašče na paŭhoda.
«Potym my budziem pracavać na vulicy Biaduli, tam u biźnies-centry budziem arandavać ofis, — raskazaŭ Marčuk. — Ciapier my afarmlajem dazvoł na pierajezd u novy ofis, jaki budziem zajmać da taho momantu, jak pabudujem ułasny budynak».
Nahadajem, na pres-kanfierencyi ŭ Minsku 22 śniežnia pasoł Polščy Lešak Šarepka zajaŭlaŭ, što jašče nie viedaje, dzie budzie pracavać pasolstva z 1 studzienia. Na toj momant, pavodle jaho słoŭ, polski bok jašče nie atrymaŭ adkazu ad «Dypservisa» (pradpryjemstva Kiraŭnictva spravami prezidenta. — BiełaPAN.). «Situacyja składanaja, ale nie bieznadziejnaja, — skazaŭ pasoł. — My ŭžo atrymali ad MZS Biełarusi dazvoł, kab pamianiać jurydyčny adras. Na hetym tydni padpišam papiaredni dahavor z ułaśnikam novaha budynka, potym — dadatkovyja pieramovy pa ŭmovach. Na ŭsio heta patrebny čas. Spadziajusia, što biełaruski bok razumieje, što nie tolki my vinavatyja ŭ hetaj situacyi, i budzie dziejničać u adpaviednaści z dypłamatyčnymi pahadnieńniami».
Raniej, u vieraśni, Šarepka zajaŭlaŭ, što polskamu boku nie ŭdajecca ŭzhadnić ź biełaruskim MZS varyjanty raźmiaščeńnia dyppradstaŭnictva ŭ Minsku. «Na našy zapyty my nie atrymali nijakaha aficyjnaha adkazu z boku „Dypservisa“. Paśla paŭtornych prośbaŭ byli dva varyjanty, jakija nas nie zadavolili, bo ŭ adnym budynku nielha navat kandycyjanier padklučyć, a druhi zanadta maleńki, uvieś piersanał pasolstva tam nie raźmieścicca», — havaryŭ dypłamat.
Jon taksama paviedamiŭ, što pasolstva samastojna znajšło dobry varyjant. «Ale heta pryvatny budynak, i ciapier uładalnik zaviaršaje praces afarmleńnia ŭsich dakumientaŭ. Paśla hetaha my pavinny budziem jašče raz źviarnucca ŭ „Dypservis“, kab atrymać dazvoł pačać niejkija pracy. Heta zojmie paŭhoda», — adznačyŭ Šarepka.
Pres-sakratar MZS Biełarusi Andrej Savinych, u svaju čarhu, zajaviŭ: «Na žal, u svaich zajavach nakont budynka pasoł Polščy spadar Šarepka mocna chitruje». Pavodle jaho słoŭ, «polski bok z poŭnym vykanańniem usich jurydyčnych pracedur byŭ prainfarmavany pra spynieńnie kantrakta na arendu budynka pasolstva jašče piać hadoŭ tamu».
Savinych taksama paviedamiŭ, što ŭ 2008 hodzie polskamu pasolstvu byŭ vydzieleny ŭčastak ziamli ŭ prestyžnym miescy Minska dla budaŭnictva novaha budynka. «Polski bok pahadziŭsia z hetaj prapanovaj i padpisaŭ adpaviedny pravavy akt. Dalej polski bok prosta nie rabiŭ nijakich bačnych dla nas dziejańniaŭ. Na žal, my ŭsio čaściej i čaściej sutykajemsia z prykładami, kali za zvonkimi frazami i demanstratyŭnymi pozami polskaj dypłamatyi toicca adsutnaść razumnaha sensu, a časam, jak u hetym kankretnym vypadku, — zvyčajnaja biezadkaznaść», — śćviardžaŭ u vieraśni pradstaŭnik MZS.
