U sudzie Leninskaha rajonu Miensku pradstaŭnik prakuratury paprasiŭ pakarać Kanstancina Łukašova źniavoleńniem na dva hady — z adterminoŭkaj vykanańnia pakarańnia na try hady. Kanstancina vinavaciać u supracivie milicyjantu.
Incydent adbyŭsia letaś 29 sakavika, kali Łukašoŭ na ŭłasnym aŭtamabili vyvoziŭ sa špitalu svajho brata Viačasłava Siŭčyka. Jon nie spyniŭ mašynu na patrabavańnie ludziej u cyvilnym. Ad 19 śniežnia Kanstancina trymajuć pad vartaj.
U sudzie Leninskaha rajonu Miensku ŭ spravie Kanstancina Łukašova adbylisia sprečki. Pradstaŭnik prakuratury spasłaŭsia na pakazańni Anatola Suščeni, jaki pryznany paciarpiełym u kryminalnaj spravie.
Nahadajem, letaś 29 sakavika Kanstancin Łukašoŭ na ŭłasnym aŭtamabili vyvoziŭ z 3‑ha kliničnaha špitalu svajho brata Viačasłava Siŭčyka. Ludzi ŭ cyvilnym znakami zahadali Kanstancinu spynicca, ale jon hetaha nie zrabiŭ.
Paźniej adzin ź milicyjantaŭ źviarnuŭsia ŭ prakuraturu z zajavaj pra toje, što jaho nibyta źbiŭ aŭtamabil Łukašova. Jon paprasiŭ u sudzie spahnać z Kanstancina dva miljony rubloŭ (heta kala tysiačy dalaraŭ) materyjalnaj kampensacyi za nibyta sapsavanuju vopratku.
Niahledziačy na toje, što pakazańni niekatorych śviedak supiarečyli abvinavačańniu, prakuror uziaŭ za asnovu pakazańni milicyjanta. Jon paprasiŭ pakarać Kanstancina źniavoleńniem na dva hady z adterminoŭkaj vykanańnia pakarańnia na try hady.
Advakat Kanstancina asprečyła vysnovy abvinavačańnia j paprasiła sud apraŭdać padabaronnaha, spasłaŭšysia na toje, što pieršapačatkova nie było padstavaŭ dla kryminalnaj spravy.
Havoryć brat Kanstancina Łukašova Viačasłaŭ Siŭčyk:
V.Siŭčyk: «Siońniašniaja pramova prakurora pakazała, što prakuratura absalutna nie źviartaje ŭvahu na toje, što isnuje zakanadaŭstva Respubliki Biełaruś. Prakuror spasłaŭsia tolki na pakazańni tak zvanaha paciarpiełaha. Tak što jašče treba dziakavać, što paciarpieły nie pryjšoŭ u sud i nie skazaŭ, što moj brat pieraškadžaŭ jamu lacieć na Mars. Toje, što adbyvajecca ŭ sudzie, — heta ździek nia tolki ź biełaruskaha zakanadaŭstva, ździek ź biełaruskaha narodu, a heta ździek sa zdarovaha sensu».
Maci Kanstancina Halina Siŭčyk była aburanaja vystupam abvinavaŭcy.
H.Siŭčyk: «Siońnia dva miesiacy, jak moj syn niezakonna znachodzicca ŭ SIZA. Ja spadziajusia, što sudździa abvieścić apraŭdalny prysud. Tamu što, kali voś ciapier prakuror prasiŭ umoŭna i byccam by heta miakka, i, jak advakat kazała, što lepš sinica ŭ rukach, čym žuraviel u niebie… Ale abvinavačvać niavinnaha čałavieka — taksama złačynstva, nie havoračy pra hrech, — darečy, pačaŭsia post. Ja vielmi ŭdziačnaja ŭsim tym, chto mnie telefanuje, chto jamu piša listy. Biaz vašaj padtrymki my b nia vytrymali».
20 lutaha a dziasiataj ranicy sudździa Zinaida Krasoŭskaja maje abvieścić prysud.
