Iryna Abielskaja.
12 maja ŭ Biełaruskaj miedycynskaj akademii paśladypłomnaj adukacyi prajšła abarona doktarskaj dysiertacyi Iryny Abielskaj.Byłaja asabistaja doktarka Alaksandra Łukašenki prezientavała daśledavańnie na temu «Šyjny osteachandroz: pramianiovaja vizualizacyja i technałohija miedycynskaj reabilitacyi pacyjentaŭ». U vyniku ŭ śniežni minułaha hoda prezidyum VAK prysudziŭ u śniežni minułaha hoda hałoŭnaj lekarcy prezidenckaj balnicy navukovuju stupień doktara navuk.
Adzin z čytačoŭ NN dasłaŭ u Redakcyju pytańnie, nakolki hetaja praca źjaŭlajecca adkryćciom dla mižnarodnych śpiecyjalistaŭ. Razabracca biez kamientaryjaŭ admysłoŭcaŭ adnosna dysiertacyi spn. Abielskaj amal niemahčyma. A ŭličvajučy asobu, naŭrad ci chto navažycca na kamientar.
Tym nie mienš,
jość mahčymaść acanić viadomaść Abielskaj jak navukoŭca ŭ mižnarodnaj supolnaści miedykaŭ. Heta zvarot da indeksaŭ cytavańnia — pakazčyka značnaści prac navukoŭcy, jaki vyznačajecca kolkaściu spasyłak na jaho publikacyiŭ recenzavanych navukovych pieryjadyčnych vydańniach. Inšymi słovami, jak časta zamiežnyja navukoŭcy spasyłalisia na daśledavańni Iryny Abielskaj u svaich artykułach.
Indeks cytavańnia vykarystoŭvajecca dla acenki prac daśledčykaŭ, i dazvalaje acanić uniosak navukoŭcy ŭ suśvietnuju navuku.
U najaŭtarytetniejšaj bazie navukovaha cytavańnia Scopus proźvišča Iryny Abielskaj uzhadvajecca tolki adzin raz — u suviazi ź jaje daśledavańniem «The multistage rehabilitation system for sick and disabled people» («Šmatsupienčataja sistema reabilitacyi chvorych i invalidaŭ»).
Pavodle Scopus, paśla 1995 hoda, kali stvorana sistema, nivodny artykuł aŭtarki nie cytavaŭsia.
Aŭtarytetny Rasijski indeks navukovaha cytavańnia (RINC) daje dźvie spasyłki na publikacyi Abielskaj.Heta jaje intervju časopisu «Rieproduktivnoje zdorovje v Biełarusi». Zhodna ž z daviedkaj, nivodnaj cytaty ŭ RINC na hetaje intervju niama. Jak vynikaje z samoj nazvy, razmova viałasia navat nie pra niejkija navukovyja aktualii — «Doktar Iryna Abielskaja: Z aściarožnym honaram ab pracy i prafiesii».
U jaho taksama trapiła publikacyja «Aktualnyja aśpiekty renhienałahičnaj dyjahnostyki osteachandrozu šyjnaha adździeła chrybta na etapach miedycynskaj reabilitacyi» ŭ «Viestniku rienthienołohii i radiołohii». Apošni artykuł cytujecca dvojčy. Pryčym adzin raz saaŭtaram Abielskaj A.Michajłavym u jaho inšym artykule.
Čym Iryna Abielskaja vyznačyłasia ŭ ajčynnaj navucy?
My źviarnulisia da elektronnych katałohaŭ bujnych biełaruskich biblijatek, kab pahladzieć na jaje publikacyi.
U Nacyjanalnaj biblijatecy pašukavik vydaje 16 pazicyj na Irynu Abielskuju. Heta jaje aŭtarefieraty dysiertacyj na atrymańnie spačatku stupieni kandydata miedycynskich navuk — «Pramianiovaja dyjahnostyka na etapach miedycynskaj reabilitacyi chvorych na osteachandroz šyjnaha adździeła chrybta», zatym na atrymańnie stupieni dokatara miednavuk — «Šyjny osteachandroz: pramianiovaja vizualizacyja i technałohija miedycynskaj reabilitacyi pacyjentaŭ», publikacyi ŭ navukovych zbornikach.
Prezidenckaja biblijateka vydaje tolki dźvie spasyłki. Heta intervju «Sovietskoj Biełorusii» i artykuł u «Miedicinskich novostiach». Katałoh Centralnaj navukovaj biblijateki NAN Biełarusi znachodzić čatyry pazicyi.
Darečy, letaś supracoŭniki Centralnaj navukovaj biblijateki Nacyjanalnaj akademii navuk Biełarusi sumiesna ź Biblijatekaj pa pryrodaznaŭčych navukach RAN praanalizavali vyniki daśledčyckaj aktyŭnaści biełaruskich navukoŭcach za apošnija piać hadoŭ. Zhodna ź im, u 2006-2010 hh. artykuły biełaruskich aŭtaraŭ cytavalisia 50981 raz.
Samym cytavanym ajčynnym navukoŭcaŭ u halinie miedycyny (chirurhija i ankałohija) źjaŭlajecca Jaŭhien Dziamidčyk (1925-2010).
Jaho daśledavańni cytavalisia bolš za 900 razoŭ.
Admietna, što Dziamidčyk staŭ doktaram miedycynskich navuk tolki ŭ 63 hady. Razam z tym jon źjaŭlajecca aŭtar 11 patentaŭ na vynachodnictvy.
Alaksandr Łukašenka nieadnarazova havaryŭ pra zavialikuju kolkaść u krainie kandydataŭ i daktaroŭ navuk. U listapadzie 2011 hoda na sustrečy z ajčynnymi navukoŭcami jon z naściarohaj vykazaŭsia pra situacyju, kali z 25 tysiač čałaviek, jakija majuć navukovuju stupień, u navukovych daśledavańniach zaniatyja tolki 4 tysiačy. «Čym zajmajucca astatnija?
Navošta im patrebnyja byli hetyja navukovyja stupieni? Padobna, što ŭžo modnym stała paviesić birku nie toje na łob, nie toje jašče kudy-niebudź i chadzić — kandydat navuk. A jakaja addača ad hetaha kandydactva dziaržavie?»
Łukašenka adznačaŭ, što vysokija stupieni varta davać tolki tady, kali navukoviec «zrobić niejkaje adkryćcio».
* * *
Iryna Abielskaja — vypusknica Minskaha miedycynskaha instytuta pa śpiecyjalnaści «piedyjatryja». U 1990-1994 hh. pracavała kansultantam-endakrynołaham u 9-j kliničnaj balnicy. Była asabistaj daktorkaj Alaksandra Łukašenki. Dačka byłoha ministra achovy zdaroŭja Biełarusi Ludmiły Pastajałka. U 2001-2007 i z 2009 — hałoŭny lekar Respublikanskaha kliničnaha miedycynskaha centra Kiraŭnictva spravami prezidenta.