Chalip nie vieryć u viersiju MUS nakont prašeńnia Sańnikava 9

Iryna Chalip, žonka eks-kandydata ŭ prezidenty Andreja Sańnikava, nie vieryć u viersiju MUS adnosna prašeńnia ab pamiłavańni, jakoje nakiravaŭ na imia Łukašenki jaje muž.

Kamientujučy učarašniuju zajavu pradstaŭnika MUS ab tym, što prašeńnie ab pamiłavańni Sańnikaŭ napisaŭ nie 20 listapada, jak jon sam paviedamiŭ joj, a 23 śniežnia, Chalip skazała:

«Ułady nie chacieli, kab ab napisańni prašeńnia stała viadoma raniej. Tamu i prydumali 23 śniežnia, bo napiaredadni majoj pres-kanfierencyi faktyčna zakončyŭsia termin, kali papiera mahła pastupić u administracyju prezidenta».

Žonka palityka padkreśliła: datu napisańnia prašeńnia — 20 listapada — Sańnikaŭ nazvaŭ joj padčas pieramoŭ praz škło ŭ pakoi dla spatkańniaŭ u kałonii «Vićba-3» 24 studzienia.

Chalip znoŭ zajaviła, što zadača ŭłady «nie prosta vybić z palitźniavolenych papierki» z prośbaj ab pamiłavańni, a «źniščyć ich fizična».

«U inšym vypadku Łukašenka na pres-kanfierencyi 23 śniežnia razmachvaŭ by hetymi papierkami, zajaŭlajučy, što jaho prosiać ab pamiłavańni»,

 — pierakananaja žonka Sańnikava.

Nahadajem, na ŭčarašniaj pres-kanfierencyi Chalip paviedamiła, što jaje muž pad uździejańniem katavańniaŭ napisaŭ prašeńnie ab pamiłavańni na imia Łukašenki jašče 20 listapada minułaha hoda, znachodziačysia na pierasyłcy ŭ mahiloŭskaj turmie.

Jaje słovy abvierhli ŭ MUS. Pradstaŭnik ministerstva paviedamiŭ, što prašeńnie ab pamiłavańni na imia prezidenta Sańnikaŭ padaŭ nie 20 listapada, a 23 śniežnia. Zhodna z praceduraj, chadajnictva ab pamiłavańni asudžany padaje praz administracyju papraŭčaj ustanovy, dzie adbyvaje pakarańnie.

Administracyja, u svaju čarhu, na praciahu miesiaca pavinna nakiravać chadajnictva na razhlad prezidenta.

U MUS śćviardžajuć, što chadajnictva Sańnikava było nakiravana administracyjaj kałonii «Vićba-3», dzie jon zaraz utrymlivajecca, u adździeł pa pytańniach hramadzianstva i pamiłavańnia Administracyi prezidenta 23 studzienia, roŭna praź miesiac paśla taho, jak było napisana.

U Administracyi prezidenta situacyju z prašeńniem nie kamientujuć.

Jak paviedamlałasia raniej, 27 studzienia z Sańnikavym maje namier sustrecca jaho advakat. Pavodle vynikaŭ hetaj pajezdki svajaki palityka buduć płanavać dalejšyja dziejańni pa jaho ratavańni.

Andrej Sańnikaŭ asudžany na piać hadoŭ pazbaŭleńnia voli ŭ kałonii ŭzmocnienaha režymu pavodle abvinavačańnia ŭ arhanizacyi masavych biesparadkaŭ 19 śniežnia 2010 hoda. Adbyvać pakarańnie palityk pavinien byŭ u papraŭčaj kałonii Navapołacka (Viciebskaja vobłaść), adnak potym jaho nieadnarazova etapavali ŭ inšyja ŭstanovy. Z 8 listapada pa 20 studzienia eks-kandydata ŭ prezidenty trymali ŭ poŭnaj izalacyi — da jaho nie dapuskali ni svajakoŭ, ni advakataŭ.

Siarhiej Karalevič, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH