Jon ličyć, što ŭ demakratyčnych sił chopić resursaŭ, kab pravieści poŭnamaštabnuju palityčnuju kampaniju.
— U nas jość svoj scenar, i nam zdajecca, što mienavita hety scenar aptymalny i adzina realny, jaki možna realizavać u našych biełaruskich umovach. Sutnaść jaho va ŭltymatumie ŭładzie. U im utrymlivajucca patrabavańni ab vyzvaleńni palityčnych źniavolenych i praviadzieńni demakratyčnych reformaŭ. Choć by na ŭzroŭni padliku hałasoŭ. Kali źniavolenyja vychodziać na svabodu i nam dajuć zrazumieć, što ŭ kamisii buduć uklučać pradstaŭnikoŭ demakratyčnych partyj, hramadzianskaj supolnaści, tady jość sens udzielničać u kampanii. Vybarami ja heta ŭsio roŭna nie nazavu. Ale ŭdzielničać u palityčnaj kampanii tady treba. I treba zastavacca ŭ joj da dnia hałasavańnia, kab vybarščyki mieli mahčymaść zrabić svoj vybar.
Kali ž ułada nie idzie na hetyja kroki da peŭnaha času, to tady pačynajecca kampanija aktyŭnaha bajkotu.«Biełaruskaja chryścijanskaja demakratyja» na svajoj apošniaj radzie vyrašyła, što krajni termin my biełaruskim uładam dajem — da 25 sakavika.
Ciapier na sustrečach «kaalicyi šaści» razhladajucca roznyja scenary našych pavodzinaŭ na vybarach, ale asabista dla mianie pryjarytetam źjaŭlajecca zachavańnie adzinstva demakratyčnych siłaŭ. Pierš za ŭsio my pavinnyja pamiatać, što my pradstaŭniki nie tatalitarnych, a maralnych režymaŭ — my demakraty. I ja liču, što niemahčyma, kab ludzi hałasavali za tak zvanych niezaležnych kandydataŭ, kali za kratami siadziać palitviaźni! Heta ŭ nas na pieršym miescy ŭ pryjarytetach. A na druhim — abjadnańnie demakratyčnych sił. My nie pavinnyja paŭtarać pamyłak, jakija rabili apošnija 10 hadoŭ. Kali my sami siabie dyskredytavali, kali apazicyjaniery publična svarylisia. I kali ciapier u nas budzie dva scenary, adzin — za radykalny bajkot, druhi — za poŭny ŭdzieł u vybarach, voś heta budzie sapraŭdnaja paraza na nastupnych vybarach.
Ciapier u nas prachodzić dyskusija. I pryncypovych adroźnieńniaŭ u pazicyi inšych udzielnikaŭ kaalicyi šaści z prahramaj BCHD niama. Idzie razmova pra taktyku, chutčej pra techničnaje vykanańnie.
— Jak vy ličycie, ci chopić siońnia ŭ apazicyi sił na praviadzieńnie dziejsnaj kampanii aktyŭnaha bajkotu vybaraŭ?
— Ja liču, što ŭ biełaruskich demakratyčnych sił dastatkova resursaŭ dla praviadzieńnia dziejsnaj, poŭnamaštabnaj palityčnaj kampanii 2012 hoda. Ale ŭmovaj paśpiachovaści hetaj kampanii źjaŭlajecca adzinstva demakratyčnych sił, ahulny scenar. I kab my nie padyhryvali režymu, a zmahalisia za svabodu, demakratyju, svabodnyja vybary i vyzvaleńnie palitviaźniaŭ. I kali adzinstva budzie, i budzie heta adzinstva ŭ sumiesnych dziejańniach, to ŭ nas atrymajecca ŭsio zadumanaje. A heta svabodnyja vybary ŭ pierśpiektyvie. Tamu ja liču, što niavažna, u jakoj formie kampanija budzie pravodzicca — bajkot heta budzie ci ŭdzieł. Hałoŭnaje, kab našy ŭmovy byli vykananyja. Udzieł biez vykanańnia hetych umovaŭ — hulnia na baku ŭłady.
— U vypadku ŭdziełu ŭ vybarach jak budziecie pamiž saboj dzialić vybarčyja akruhi?
— Jak raz vakoł heta pytańnia sprečak nie budzie. Ciapier u Homieli ŭsie demakratyčnyja siły pracujuć razam. I heta prykład nam usim. Jany tam pamiž saboj akruhi padzialili biez usiakich prablem i viaduć aktyŭnuju pracu z nasielnictvam. Ludziam raskazvajuć pra ŭmovy, jakija apazicyja płanuje vystavić uładzie, pra toje, jak u rečaisnaści ŭ nas prachodziać vybary. Ludzi pracujuć. I nichto nie pasvaryŭsia, «dzielačy» akruhi. Dumaju, i dla nas heta budzie samym prostym. Kali da hetaha dojdzie», — skazaŭ Vital Rymašeŭski ŭ intervju euramost.org.
