U BDU płata za navučańnie budzie składać da 12 młn rubloŭ 12

Z 1 lutaha ŭsie dziaržaŭnyja VNU pierahladajuć svaje ceńniki na padrychtoŭku śpiecyjalistaŭ na płatnaj asnovie, što źviazana z rašeńniami

ŭrada ab pavieličeńni taryfnaj staŭki pieršaha razradu i pavyšeńni taryfnych akładaŭ piedahahičnym rabotnikam ź liku prafiesarska-

vykładčyckaha składu biez vučonaj stupieni ci vučonaha zvańnia.

Miž inšym, heta ŭžo treciaje z pačatku navučalnaha hoda pavyšeńnie koštu płatnaha navučańnia.

Adnym ź pieršych novy košt padrychtoŭki śpiecyjalistaŭ na płatnaj asnovie ahučyŭ Biełdziaržuniviersitet. Na asobnych śpiecyjalnaściach BDU košt navučańnia pieravyšaŭ 9,3 miljona rubloŭ jašče paśla apošniaha pavyšeńnia cen, jakoje adbyłosia ŭ listapadzie. Ale ŭžo ŭ lutym ceńniki na samych darahich i prestyžnych śpiecyjalnaściach pierasiahnuli płanku ŭ 12 miljonaŭ rubloŭ.

Tak, 12 młn 67 tysiač rubloŭ vymušany buduć płacić za svajo navučańnie ciapier studenty pieršaha kursa dzionnaj formy navučańnia ekanamičnaha, jurydyčnaha fakultetaŭ, fakulteta mižnarodnych adnosin, a taksama studenty niekatorych śpiecyjalnaściaŭ Instytuta žurnalistyki, humanitarnaha, fiłałahičnaha fakultetaŭ i fakulteta fiłasofii i sacyjalnych navuk.

Na miechanika-matematyčnym fakultecie, FPMI, fakultecie radyjofiziki i kampjutarnych technałohij, fizičnym, chimičnym, hieahrafičnym fakultetach košt navučańnia pierasiahnuŭ 10 miljonaŭ rubloŭ, na bijałahičnym fakultecie — 11 miljonaŭ rubloŭ.

A samymi «tannymi» dla pieršakurśnikaŭ zastajucca ŭ BDU śpiecyjalnaści «biełaruskaja fiłałohija», «ruskaja fiłałohija», «słavianskaja fiłałohija» i «sacyjalnaja rabota» — 8 młn 683 tysiačy rubloŭ.

Faktyčna na ŭsich śpiecyjalnaściach košt navučańnia pavysiŭsia ad 2,2 da 2,7 miljona rubloŭ.

Jak padkreślivajecca ŭ tłumačalnaj zapiscy da zahada ab pavyšeńni koštu padrychtoŭki śpiecyjalistaŭ na płatnaj asnovie, u studzieni rost zarabotnaj płaty skłaŭ u BDU 45,6%, u tym liku zarabotnaja płata prafiesarska-vykładčyckaha składu pavialičyłasia na 48,1%. Rost vydatkaŭ na zarabotnuju płatu ŭ canie skłaŭ 45,6%. A vydatki na apłatu kamunalnych pasłuh i inšyja zastalisia na ŭzroŭni listapada 2011 hoda.

Uličvajučy sacyjalnuju značnaść pasłuhi i rekamiendacyi Ministerstva adukacyi, rost koštu płatnaha navučańnia ŭ paraŭnańni ź dziejnaj canoj na dzionnaj i zavočnaj formie navučańnia nie pieravysiŭ 29%.

«Niedapuščeńnie rostu cany bolš čym na 29% było dasiahnuta šlacham źnižeńnia ŭzroŭniu rentabielnaści, — śćviardžajuć u BDU. — Na dadzieny momant „vaha“ zarabotnaj płaty i naličeńniaŭ na zarabotnuju apłatu ŭ kalkulacyi navučańnia składaje 88,4%. Udzielnaja vaha kamunalnych vydatkaŭ — 8,9%, inšych vydatkaŭ — 2,7%. Takim čynam, siaredniaja rentabielnaść na zavočnaj formie navučańnia składaje 4%, a na dzionnaj — 0%».

Treba dadać, što ŭzrovień apłaty ŭ kankretnaj VNU moža zaležać ad śpiecyjalnaści, jakuju atrymlivaje student, kvalifikacyi, stažu raboty prafiesarska-vykładčyckaha składu i inšych piedrabotnikaŭ, a taksama stanu materyjalna-techničnaj bazy. Tradycyjna samaj darahoj (pryčym nie tolki ŭ nas, ale i va ŭsim śviecie) źjaŭlajecca vyšejšaja miedycynskaja adukacyja. Ale košt navučańnia ŭ BDU litaralna nastupaje płatnaj padrychtoŭcy miedykaŭ na piaty.

Źviazda

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH