Siońniašniaja maskoŭskaja presa ažyŭlena kamentuje źviestki pra namiery Miensku raspačać pryvatyzacyju šerahu bujnych pradpryjemstvaŭ.
Śćviardžajecca, što adpaviednyja prapanovy ŭtrymlivajucca ŭ planie mierapryjemstvaŭ pa stabilizacyi sytuacyi na ŭnutranym valutnym rynku i dasiahnieńni stanoŭčaha salda zamiežnaha handlu ŭ 2007 hodzie. Dakument, piša maskoŭskaja presa, padrychtavany Ministerstvam ekanomiki Biełarusi pavodle ŭradavaha daručeńnia.
“Padnačalenyja Łukašenki prapanujuć jamu pradać Biełaruś”, – kidka paviedamlaje "Vriemia novostiej".
Łasyja kavałki biełaruskaj ŭłasnaści peŭna ž vabiać rasiejskich aliharchaŭ. Ale Maskva adrazu pačynaje źbivać košty.
Tak, družna zhadvajuć, jak u svoj čas ichniaja “Bałtyka” by fanera nad Paryžam pralacieła nad mienskaj “Krynicaj”. Krynica (vo jaki kalambur!:), blizkaja da Kramla, vykazała ŭ interviju “Viedomostiam” zaściarohu, što “Miensk znoŭ moža vystavić sacyjalistyčna-bandyckija umovy prodažu i zavysić canu aktyvaŭ u 10 razoŭ. U rasiejskich kampanijach nia durni siadziać, kab marnavać takija hrošy”.
Ale ci nie zarana raspačaŭsia zvon?
Ci razhonicca Alaksandar Łukašenka davać admašku na maštabny rasprodaž “familnaha srebra”?
Kiraŭnik Biełaruskaha sajuzu pradprymalnikaŭ Alaksandar Patupa schilny ličyć, što kiraŭnictva zaraz vybiraje miž dvuma varyjantami, i zusim nia vyklučany varyjant rekvizycyjny: “Hrošy dziela kampensacyi strataŭ ad rostu koštaŭ na enerharesursy možna atrymać nia tolki šlacham liberalizacyi, ale i sacyjalistyčnymi metadami, kali dziaržava adbiraje ŭsio, što trapicca pad ruku”.
Palitolah Andrej Fiodaraŭ taksama miarkuje, što kiraŭnictva krainy da apošniaha budzie staracca zachavać vahary kantrolu za ŭłasnaściu, tuju ž “załatuju akcyju”, naprykład.
Ź inšaha boku, cisk ekanamičnych ciažkaściaŭ peŭna ž budzie tolki narastać. I ŭ hetaj sytuacyi, kaža Fiodaraŭ, u hulniu na ekanamičnym poli moh by pasprabavać ustupić Zachad.
Takim čynam, užo nia treba być vialikim ekspertam, kab zrazumieć, što biełaruski cud atrymaŭ praboinu nižej za vaterliniju. Kab jaje zatknuć, patrebnyja hrošy, šmat hrošaj. Raspačaŭsia lichamankavy pošuk kredytaŭ. I voś nastaŭ etap pakutlivaha vahańnia ŭ pytańni pryvatyzacyi.
Admysłoŭcy kažuć, što biełaruskaja ekanamičnaja madel pa vialikim rachunku asudžanaja.
Pytańnie – pra varyjanty jaje niezajzdrosnaha losu.
Viedajučy mentalnaść ajčynnaha kiraŭnictva, možna mierkavać, što bolej imavierny varyjant, kali adsiakać sacyjalistyčny chvost buduć za niekalki razoŭ. I paspality lud adčuje na sabie ŭsie vydatki takoha šlachu.
