1 796 podpisaŭ žycharoŭ Salihorsku sabrali aktyvisty niezarehistravanaha «Maładoha Frontu» ŭ padtrymku biełaruskaj movy ŭ haradzkim hramadzkim transparcie, u miascovych ŚMI. Podpisy pieradadzienyja ŭ miascovy harvykankam.
Zbor podpisaŭ byŭ raspačaty na pačatku lutaha. Arhanizavali jaho siabry Salihorskaje filii niezarehistravanaha «Maładoha Frontu». Siarod padpisantaŭ – Alaksandar Milinkievič. Moładź zładziła ŭ Salihorsku niekalki pikietaŭ ŭ padtrymku biełaruskaje movy, pravodziła infarmacyjnyja akcyi. U pryvatnyja j dziaržaŭnyja pradpryjemstvy horada, firmy j arhanizacyi byli nakiravanyja zvaroty.
Usiaho było vyłučana čatyry prapanovy: biełarusizavać hramadzki transpart, arhanizavać praviadzieńnie va ŭsich navučalnych ustanovach horadu litaraturnaha konkursu «Mova maich prodkaŭ», zładzić na miascovym telebačańni biełaruskamoŭnaje tok‑šoŭ, stvaryć u miascovaj aficyjnaj hazecie «Salihorski vieśnik» admysłovaj rubryki, pryśviečanaj historyi i kultury Słuččyny.
U aŭtorak 27 lutaha moładzievyja aktyvisty mieli sustreču z meram Salihorsku Alaksandram Rymašeŭskim, padčas jakoj i byli pieradadzienyja podpisy. Uražańniami ad sustrečy ź kiraŭnictvam horadu dzielicca aktyvist salihorskaha «Maładoha frontu» Ivan Šyła: «Našyja podpisy pryniali i zarehistravali, ale spadziavacca na spryjańnie z boku haradzkich uładaŭ, mabyć, nie vypadaje». Pa jaho słovach, sens hutarki źvioŭsia da taho, što moładź zajmajecca nia tym, što jana dziejničaje ad imia «kuplenych amerykancami palitykaŭ i arhanizacyjaŭ». Na dumku sp. Rymašeŭskaha, pytańni movy i kulturna‑histaryčnaj spadčyny mała cikaviać mieścičaŭ. Jon prapanavaŭ moładzi zaniacca sapraŭdnaj pracaj – u horadzie budujecca ladovy pałac, i moładź musiła b ahitavać salihorcaŭ udzielničać u subotnikach i pieraličvać srodki na pabudovu pałacu.
U časie hutarki mera Salihorsku painfarmavali taksama pra praviadzieńnie seryi viasnovych akcyjaŭ. Na što jon iznoŭ paŭtaryŭ: «Nia tym zajmajeciesia, lepš by karovaŭ daili ŭ ahraharadkach».
