Uładzimir Jaromienak. Fota kurier.me.
15 sakavika sudździa Siarhiej Bandarenka pryniaŭ adpaviednaje rašeńnie. Nahlad za Uładzimiram ustanoŭleny na adzin hod. Na pasiadžeńnie maładoha čałavieka pryvieźli ŭ kajdankach ź izalatara, dzie jon adbyvaje administracyjny aryšt. 11 sakavika sud Leninskaha rajona Minska pryznaŭ Jaromienku vinavatym va ŭdziele ŭ niesankcyjanavanym mierapryjemstvie — u akcyi «Padciaryjesia!». Raniej jon jašče trojčy byŭ asudžany na administracyjnyja aryšty.
Za ŭdzieł u mirnaj akcyi pratestu 19 śniežnia 2010 Uładzimira Jaromienku adpravili na 3 hady ŭ kałoniju. Letaś jaho pamiłavaŭ Łukašenka.
Pravaabaronca Nasta Łojka adznačyła, što
pamiłavańnie palitviaźniaŭ Łukašenkam nie aznačaje ich reabilitacyju — sudzimaść ź ich nie źniataja.
I tamu jany znachodziacca na prafiłaktyčnym uliku ŭ orhanach unutranych spraŭ.
Pravaabaronca ličyć, što taki chutki razhlad spravy Jaromienki spatrebiŭsia dla taho, kab spynić aktyŭnaść maładafrontaŭca pierad 25 Sakavika. Łojka nie vyklučaje, što
previentyŭny nahlad moža być vykarystany i da inšych aktyvistaŭ.
Tak, 13 sakavika na čarhovyja sutki asudzili byłoha palitviaźnia Paŭła Vinahradava. Heta druhoje administracyjnaje parušeńnie, što daje padstavu da ŭviadzieńnia abmiežavańniaŭ i ŭ adnosinach da jaho.
Asoba, za jakoj ustanoŭleny previentyŭny nahlad, abaviazanaja źjaŭlacca pa vyklikach u orhany ŭnutranych spraŭ i davać tłumačeńni pa pytańniach vykanańnia patrabavańniaŭ previentyŭnaha nahladu; papiaredzić orhan unutranych spraŭ ab źmienie miescaŭ pracy i žycharstva; vyjazdžać za miežy rajona (horada) tolki sa zhody orhana ŭnutranych spraŭ. Pry hetym upaŭnavažanyja supracoŭniki mohuć prychodzić da takoj asoby ŭ luby čas sutak. Pry troch pravaparušeńniach pad previentyŭnym nahladam moža być raspačata kryminalnaja sprava.