A.Łukašenka daŭ ustanoŭku Ł.Jarmošynaj, što siadzieła pobač ź im: “Jon atrymaje paŭtara pracenty hałasoŭ”. I atrymaje ž! — chto b sumniavaŭsia.
Kandydat Kazulin dakazaŭ svaju śmiełaść televystupami i pachodam na “ŭsiebiełaruski narodny schod”. Jon vybraŭ niečakanuju palityčnuju nišu radykała-papulista. Hety vobraz ciažka pamianiać. Heta jak Žyrynoŭski, jaki źnik by z palityčnaj sceny, jak tolki pierastaŭ być Žyrynoŭskim.
Što čakaje Kazulina paśla 19 sakavika? Razhledzim dva varyjanty: kali jon zdymaje svaju kandydaturu i kali jon zastajecca ŭ biuleteni.
Kali Kazulin zastajecca — apytańni hramadzkaje dumki dajuć jamu bolšuju papularnaść, čym u Hajdukieviča, ale istotna mienšuju, čym u Milinkieviča — dla łukašystaŭ jon spaliŭ masty i staŭ asabistym voraham, a dla demakratyčnaj apazycyi zastaŭsia kandydatam, što ŭnios raskoł, tym samym abniziŭšy šancy na pieramohu nad dyktaturaj.
Kazulin kroŭna zacikaŭleny ŭ pieramozie biełaruskaha majdanu. Heta dało b jamu asabistuju biaśpieku i liderstva ŭ biełaruskaj palitycy, naprykład, na čale papulisckaje prarasiejskaje partyi. Vychad Kazulina z kampanii ciapier, kali mahčymaści dla ahitacyi praktyčna vyčarpanyja, pavialičyŭ by šancy na pieramohu svabody — prosta tamu, što hałasy praciŭnikaŭ Łukašenki nie raściarušvalisia b, a vybar staŭ by jaśniejšy.
Ale navat kali vuličny cisk na Łukašenku akažacca biespaśpiachovym, Kazulin zachoŭvaje vyhadnuju pazycyju čałavieka, jaki ryzykavaŭ saboj u ahitacyjnaj kampanii i achviaravaŭ ambicyjami dziela demakratyčnaje spravy.
Elehantnym vychadam z kampanii Kazulin u kožnym razie zachoŭvaje siabie ŭ palitycy paśla 19 sakavika.
