Užo 2 maja kožny achvotny biełarus zmoža nabyć u adździaleńniach bankaŭ akcyi Minskaha zavoda pienistych (šampanskich) vinaŭ. Heta druhaja sproba publičnaha raźmiaščeńnia akcyj tak zvanaha «narodnaha IPO» ŭ našaj krainie.
Druhi blin
Miechanizm praviadzieńnia IPO zusim novy dla našaj krainy, ale nieskładany. Padčas jaho kampanija prapanuje ŭsim achvotnym nabyć svaje akcyi. Najčaściej u im udzielničajuć drobnyja kampanii, kab pryciahnuć hrošy na dalejšaje raźvićcio. Vialikija kampanii čaściakom chočuć atrymać praz «narodnaje IPO» publičnuju acenku svajoj dziejnaści. Kali kupcoŭ šmat, to kampanija stanovicca pryvabnaj dla bujnych inviestaraŭ i moža nieŭzabavie vyvodzić svaje akcyi na biržy.
Hod tamu pieršaj sprobaj staŭ prodaž nasielnictvu akcyj Barysaŭskaha zavoda miedycynskich preparataŭ. Pieršy blin pajšoŭ sabaku. Achvotnyja kupili ŭsiaho 223 akcyi pa 476 tysiač rubloŭ — 0,17% ad abjoma, zapłanavanaha kiraŭnictvam zavoda.
Hulnia ŭ akcyi na ćviarozuju hałavu
Ciapier na avanscenu vychodzić Minski zavod pienistych vinaŭ. Pakul što jahonyja 100% akcyj naležać dziaržavie. Biełarusam prapanujuć vykupić 25% hetaha abjomu — na $5 miljonaŭ.
Čym pradpryjemstva moža być cikavym biełarusam? Jano nasamreč stała pracuje «ŭ plus», niezaležna ad kryzisaŭ ci pieryjadaŭ «stabilnaści» ŭ biełaruskaj ekanomicy. Ahulny prybytak za try hady skłaŭ 9 miljonaŭ dalaraŭ. U vyniku naminalny košt adnoj akcyi, jaki jašče letaś składaŭ 42 tysiačy rubloŭ, ciapier składaje 171 tysiaču rubloŭ.
«Ekpart składaje kala 1,8% ad abjomu pradukcyi, viny zakuplajuć ZŠA, Izrail, Vjetnam i Polšča. Pryčym za miažoj „Savieckaje šampanskaje“ kuplajuć, raźličvajučy na popyt z boku emihrantaŭ», — kaža hienieralny dyrektar pradpryjemstva Leanid Kraŭčuk. Što da syraviny, to zavod nabyvaje jaje pieradusim u Małdovie.
Ryzyka za ŭłasnyja hrošy
Bieskłapotnaja karcina psujecca niekalki istotnymi ryzykami. Kantrolny pakiet akcyj zastajecca ŭ rukach dziaržavy, tamu vyrašać, ci naličvać dyvidendy nasielnictvu, buduć čynoŭniki. Za try apošnija hady na kožnuju akcyju było vypłačana… 720 rubloŭ, pryčym letaś (za try kvartały) — ni rubla. Z takoj samaj prablemaj sutykajucca tysiačy drobnych akcyjanieraŭ pa ŭsioj krainie — i «Amkador», i «Savuškaŭ pradukt», i inšyja prybytkovyja pradpryjemstvy admaŭlajuć u dyvidendach.
Dziaržava moža «praviarnuć» i jašče adnu machinacyju, zrabiŭšy nieŭzabavie dadatkovy vypusk akcyj, kab pradać ich zamiežnikam. Dola kožnaha akcyjaniera ŭ takim vypadku źmienšycca ŭ niekalki razoŭ.
Prablemaj stanie i prodaž svaich akcyj. Druhasny rynak u Biełarusi adsutničaje, tamu i košt akcyj nie budzie źmianiacca štodzień, jak u rasijskich ci zachodnich kampanij.
Prykład astatnim
Dla tych, kaho mahčymyja prablemy nie chvalujuć, treba źviarnucca da zarehistravanaha ŭdzielnika rynku kaštoŭnych papier, naprykład, u banki, pa afarmleńnie dakumientaŭ. Za pasłuhi ŭ «Biełarusbanku» i «Biełahraprambanku» daviadziecca zapłacić 90 tysiač rubloŭ. Paśla možna kuplać akcyi pa ahučanym košcie. U «adny ruki» budzie pradavacca nie bolš za 1000 akcyj.
Ad taho, ci skončycca prodaž akcyj Minskaha zavoda pienistych vinaŭ pośpiecham, šmat u čym zaležyć, ci buduć vychodzić na «narodnuju pryvatyzacyju» IPO inšyja biełaruskija kampanii.
***
Biełaruskaja kampanija EPAM Systems, jakaja zajmajecca raspracoŭkaj prahramnaha zabieśpiačeńnia, atrymała ŭ vyniku IPO ŭ Ńju¬Jorku $72 miljony.
Prybytkovaść Minskaha zavoda pienistych vinaŭ
2009 — $3,3 miljona. Dyvidendy — 284 rubli na akcyju.
2010 — $2,9 miljona. Dyvidendy — 435 rubloŭ na akcyju.
2011 (1–3 kv.) — 2,8 miljona. Dyvidendy — 0 rubloŭ na akcyju.
