Sustreča prajšła ŭ Mienskim harvykankamie ŭ prysutnaści namieśnika staršyni harvykankamu Michaiła Ciciankova, načalnika mienskaj milicyi Anatola Kulašova i prakurora horadu Mikałaja Kulika. Pra padrabiaznaści sustrečy raskazaŭ Alaksandar Milinkievič pa telefonie karespandentu «Našaj Nivy».
Zajaŭnikam akcyi było abvieščana, što praviadzieńnie akcyi 25 Sakavika na Kastryčnickaj płoščy "nie mahčymaje". Byŭ «prapanavany» alternatyŭny varyjant: zbor udzielnikaŭ la prezydyjumu Nacyjanalnaj akademii navuk, mirnaje šeście pa chodnikach vulicy Surhanava -- i mitynh na płoščy Banhałor. "U akcyi nie pavinny ŭdzielničać bolš za tysiaču čałaviek", - padkreślili ŭ harvykankamie. Taksama budučym arhanizataram čarhovy raz nahadali pra mahčymuju adkaznaść za parušeńnie praviłaŭ praviadzieńnia mitynhaŭ i schodaŭ.
Alaksandar Milinkievič zajaviŭ, što rašeńnie harvykankamu pra źmianieńnie farmatu šeścia nie prymalnaje, jano piarečyć Kanstytucyi. «My prapanavali ŭładzie kampramis i zaśviedčyli, što sami nastrojeny suprać kanfrantacyi. Svajoj admovaj ŭłada nie ŭśviedamlaje realnaj sytuacyi ŭ krainie».
Sp. Milinkievič zajaviŭ, što 25 Sakavika pojdzie na Kastryčnickuju płošču.
Na sustrečy prysutničali supracoŭniki televizii, tamu, mahčyma, vyniki sustrečy "pakažuć".
Nahadajem, što mierkavany pačatak akcyi a 12-j. Taksama zaznačym, što ŭ noč z 24 na 25 sakavika na terytoryi Biełarusi ŭvodzicca letni čas, i hadzińniki buduć pieraviedzienyja na hadzinu napierad.
