1,7% skłaŭ u krasaviku rost spažyvieckich cen u Biełarusi. Z pačatku hoda ceny pavialičylisia na 6,8%, paviedamlaje Nacyjanalny statystyčny kamitet. U studzieni ceny ŭzraśli na 1,9%, u lutym — na 1,5%, u sakaviku — taksama na 1,5%.
Charčavańnie ŭ krasaviku padaražeła na 1,8% (za čatyry miesiacy — na 6,9%), u tym liku ałkahol — na 5,6%, aharodnina — na 5%, jajki — na 2%, miasa i ptuška — na 1,9%, małako i małočnyja pradukty, chleb i chlebabułačnyja vyraby — na 1,5%.
Ceny na niecharčovyja tavary pavialičylisia na 1,2% (5,3%). U lidarach — bienzin (5,5%), viełasipiedy i matacykły (2,3%), miedykamienty (2,1%), budmateryjały (1,5%).
Taryfy na płatnyja pasłuhi nasielnictvu pavysilisia na 2,5% (9,9%). Najbolš za ŭsio padaraželi prajezd u aŭtamabilnym transparcie pryharadnych znosinaŭ (20%), u haradskim transparcie (17,4%), techabsłuhoŭvańnie žyłych pamiaškańniaŭ (12,9%), sanatorna-azdaraŭlenčyja pasłuhi (6,7%).
Ceny vytvorcaŭ pramysłovaj pradukcyi ŭzraśli za miesiac na 2,2%, z pačatku hoda — na 7,6%, sielhaspradukcyi — adpaviedna na 1,2% i 15,3%, košt budaŭniča-mantažnych rabot — na 4,6% i 12,9%.
Urad raźličvaje ŭtrymać hadavuju inflacyju na ŭzroŭni 19—22%. U 2011 hodzie ceny ŭzraśli na 108,7%.
