Paralelna z akcyjaj na Dzień Voli, ułady zaplanavali svaje mierapryjemstvy. U toj ža čas, na jaki pryznačany zbor na Kastryčnickaj, la nacyjanalnaj biblijateki i ŭ aeraporcie “Miensk-1” pačniecca akcyja BRSM. Razam ź Irynaj Darafiejevaj, Camerata, Jakavam Navumienkam, arkiestram Finbierha i Rusłanam Alachnom na afišach byli zajaŭlenyja i rok-hurty “Krok”, “Killqitau”, “Screamline”, “Incilica”, a taksama laŭreaty “Basovišča-2004” – “Tarpač”. Siońnia ŭsie rokiery admovilisia ad udziełu ŭ hetym mierapryjemstvie.
Ideja rok-kancertu ŭ aeraporcie naležyć pradusaru Anatolu Marcinoviču, pamočniku režysera akcyi “Za niezaležnuju Biełaruś”. Jon ściardžaje, što litaralna ŭčora razmaŭlaŭ z usimi pradstaŭnikami hurtoŭ, i nichto nie admaŭlaŭsia ad udziełu. A.Marcinovič paćvierdziŭ palityzavanaść kancertu: “Tolki kamercyjnyja imprezy mohuć być pa-za palitykaj”. “Na ŭsich adna Biełaruś, i kali ludzi nie razumiejuć, što jany prosta artysty i jany vystupajuć pierad ludźmi, jakija pryjšli ich pasłuchać – to heta vyklučna ich prablemy”, — padsumavaŭ pamočnik režysera akcyi BRSM.
Vakalistka hurtu “Tarpač” Volha Samusik raspaviadaje, što ŭ miežach akcyi BRSM miełasia prajści prezentacyja składanki alternatyŭnaj muzyki. “Vidać, ludzi, jakija zajmalisia hetym prajektam vyrašyli aščadzić hrošy i ŭpisali nas na 25-ha”, — kaža śpiavačka. Muzyki ściardžajuć, što nia viedali, jakaja heta budzie akcyja, tamu dali zhodu. I apynulisia na afišach pobač ź “Tiani-Tołkaj” i Papłaŭskaj dy Cichanovičam.. “Kab nie padstaŭlać adzin adnaho, my parailisia, — apaviadaje Volha Samusik. — I vyrašyli nie iści na hetuju akcyju”.
