Rabočaj hrupie AAN pa advolnych zatrymańniach aktyvisty inicyjatyvy «Pravaabaroncy suprać katavańniaŭ» nakiravali terminovaje paviedamleńnie z prośbaj adreahavać na chvalu advolnych administracyjnych aryštaŭ u Biełarusi.
Jak paviedamlaje sajt protivpytok.org, u skarzie ŭtrymlivajecca infarmacyja pra Dźmitryja Kramianieckaha, Ramana Vasiljeva, Uładzimira Jaromienku, Ivana Amielčanku. Apisvajecca schiema, jakaja šmatrazova paŭtarajecca apošnim časam, kali čałavieku, jaki ŭžo adbyŭ administracyjny aryšt, biez vyzvaleńnia pradjaŭlajecca novaje falšyvaje abvinavačańnie, u suviazi ź jakim jaho znoŭ pryhavorvajuć da aryštu.
Jak adznačajuć pravaabaroncy, faktyčna maładyja ludzi nie vychodziać na volu i navat tearetyčna nie mohuć učynić pravaparušeńniaŭ, u jakich jany abvinavačvajucca. Taksama nieviadoma, ci buduć jany vyzvalenyja paśla adbyvańnia čarhovych «sutak».
«Niebiaśpieka zaklučajecca ŭ tym, što ŭmovy ŭtrymańnia ŭ Centry izalacyi pravaparušalnikaŭ źjaŭlajucca biesčałaviečymi i źnievažajuć čałaviečuju hodnaść: u kamierach niama asobnych spalnych miescaŭ, paścielnaja bializna nie vydajecca, niama štodzionnych prahułak na śviežym pavietry, tempieraturnyja ŭmovy ŭ načny čas sutak dasiahajuć 13–14 hradusaŭ, — havorycca ŭ skarzie. — Takim čynam, u sukupnaści ŭmovy ŭtrymańnia nie adpaviadajuć art. 9, art. 10, art. 11, art. 12, art. 19, p. 2 art. 20, p. 1 art. 21 Minimalnych standartnych praviłaŭ abychodžańnia sa źniavolenymi AAN, i źjaŭlajucca parušeńniem art. 7 Pakta. Takija ŭmovy ŭtrymańnia mohuć pryčynić istotny ŭron zdaroŭju aktyvistaŭ».
Aŭtary prosiać hrupu pa advolnych zatrymańniach nieadkładna zaklikać biełaruskija ŭłady spynić advolnyja zatrymańni Dźmitryja Kramianieckaha, Ramana Vasiljeva, Uładzimira Jaromienku, Ivana Amielčanku za vykazvańnie ich dumki, vykonvać ich prava na asabistuju niedatykalnaść i spraviadlivy sud.
«Asablivaści terminovych pracedur u tym, što dla zvarotu ŭ paradku hetych mier nie abaviazkova prachodzić usie efiektyŭnyja srodki pravavoj abarony, — patłumačyŭ pravaabaronca Siarhiej Uścinaŭ. — Terminovyja miery isnujuć dla taho, kab spynić peŭnyja dziejańni ŭ parušeńni prava nie źviedvać advolnaje zatrymańnie kankretnych asob, a taksama kali jość surjoznyja apasieńni taho, što ŭ asoby, jakaja źviedała advolnaje zatrymańnie, u vyniku hetaha mohuć być surjoznyja prablemy sa zdaroŭjem. Rabočaja hrupa, kali paličyć patrebnym, nakiroŭvaje ŭ terminovym paradku zaklik da ministra zamiežnych spraŭ adpaviednaj dziaržavy z prośbaj da ŭrada pryniać nieabchodnyja miery da zabieśpiačeńnia pravoŭ čałavieka zatrymanych».
Nahadajem, raniej niezarehistravany pravaabarončy centr «Viasna» pryniaŭ zajavu, u jakoj taksama zapatrabavaŭ spynić palityčny pieraśled hramadskich aktyvistaŭ. Pravaabaroncy asudzili niezakonnaje pryciahnieńnie da administracyjnaj adkaznaści ŭ vyhladzie aryštaŭ maładziožnych aktyvistaŭ Michaiła Muskaha, Dźmitryja Kramianieckaha, Ramana Vasiljeva, Mikałaja Dziemidzienki, Paŭła Vinahradava, a taksama pravaabaroncy Aleha Vołčaka.
Pravaabaroncy padkreślivajuć, što sistematyčnaje asudžeńnie hramadskich aktyvistaŭ «na asnovie sfalsifikavanych materyjałaŭ ab administracyjnym pravaparušeńni za drobnaje chulihanstva źjaŭlajecca złačynnaj formaj advolnych zatrymańniaŭ». «Haniebna, što ŭ hety niezakonny pieraśled uciahnutyja nie tolki orhany ŭnutranych spraŭ, ale i sudy, jakija vynosiać pryhavory na asnovie falšyvych materyjałaŭ», — havorycca ŭ zajavie.
Jak adznačajuć pravaabaroncy, Muski, Kramianiecki i Dziemidzienka ŭvohule tolki za viasnu 2012 hoda adbyli 37 sutak administracyjnaha aryštu, a Vinahradaŭ i Vołčak dvojčy byli asudžanyja «na asnovie sfalsifikavanych supracoŭnikami milicyi materyjałaŭ».
Niezarehistravany PC «Viasna» zapatrabavała nieadkładna spynić praktyku administracyjnaha pieraśledu i niezakonnaha asudžeńnia hramadskich aktyvistaŭ pa sfalsifikavanych abvinavačańniach, a taksama pryciahnuć da adkaznaści ŭsich słužbovych asob, vinavatych u niezakonnych asudžeńniach.
