Pres-kanfierencyja dypłamata prymierkavanaja da Dnia Rasii, jaki adznačajecca ŭ susiedniaj krainie 12 červienia.
«Dla Rasii toj čas [1991 — „NN“] byŭ niaprosty, jak i staleńnie biełaruskaj niezaležnaści», — adznačyŭ Surykaŭ.
Pasoł nieadnarazova nazyvaŭ biełarusaŭ «bratami». «My ciesna supracoŭničajem va ŭsich śfierach — ad kultury da kosmasu». Surykaŭ skazaŭ, što ŭ Biełarusi pa apytańniach, jak «prazachodnich» (vyraz Surykava) sacyjołahaŭ, tak i aficyjnych, kala 60% hramadzian padtrymlivajuć sajuz z Rasijaj.«Ci jość u nas ciažkaści? Jość. Bieź ich nie abyścisia», — adznačyŭ Alaksandr Alaksandravič.
Pieršaje pytańnie ad BIEŁTA pra mytny zbor na zamiežnyja aŭtamabili: jak abaranić intaresy nie tolki rasijskaha aŭtaprama, ale biełarusaŭ, dzie ceny ŭzrastuć?
«Dyk i ŭ nas uzrastuć, treba ž ciamić. Pieramovy pa hetym pytańni nie skončanyja. Naturalna, padaražeńnie aŭtamabila i ŭdar pa kišeni, ale ź inšaha — zachoŭvańnie pracoŭnych miescaŭ u aŭtapramie».«Biełarusy taksama pavinny zajmacca aŭtapramam. Jakim? Jość pytańni. Jość rasijski aśpiekt, jość kitajski», — adznačyŭ Surykaŭ.
Nastupnaje pytańnie pra pradpryjemstvy, jakija Rasija hatovaja pryvatyzavać u Biełarusi. «Mianie naściarožvaje takaja pastanoŭka pytańnia. Nas cikavić u pieršuju čarhu padniaćcie ekanomiki Biełarusi. A nieadjemnaj častkaj hetaha ruchu źjaŭlajucca inviestycyi, što ŭkładvajucca ŭ aktyvy pradpryjemstvaŭ. Heta inviestycyi, a nie pryvatyzacyja. U Biełarusi adsutničajuć svaje inviestycyi, bo dziaržava małaja.
Nijakaha rasijskaha śpisa nie isnuje. Jość intaresy ŭ našych naftazdabytčykaŭ. Nie vyklučaju, što jość intaresy ŭ našych kalijščykaŭ. Napeŭna, u aŭtamabilistaŭ. Inakš Kitaj pa čarzie razdušyć i KamAZ, i MAZ», — kaža pasoł.
«Ja pakul daloki ad usialakich miemuaraŭ, nie źbirajusia hetym zajmaccca. Miemuaraŭ ciapier stolki ŭ Rasii, što prosta žudka. Łukašenka ŭžo 18 hadoŭ va ŭładzie, a nijakaha miemuara niama. Uładzimir Pucin taksama ničoha nie naradziŭ. A fihury jany bolš značnyja za pasłoŭ», — zaznačyŭ Surykaŭ.
«Ja staŭlusia krychu skieptyčna da paniatkaŭ palitviazień ci nie. U zakanadaŭstvie Biełarusi niama paniatku „palitviazień“. Jeŭrapiejskaja supolnaść ličyć, što cisk na ludziej jość.
Adnosić da palitviaźniaŭ tych ludziej, što zakidali naša pasolstva kaktejlem Mołatava — dziakuj Bohu, što heta było nočču, a nie mahu adnosić hetych ludziej da palitviaźniaŭ. Kali b ich aryštavali na našaj terytoryi, to jany b dakładna siadzieli. Chiba heta palityka? Ja nie skažu, što heta teraryzm. Nie, złosnaje chulihanstva.Hetych ludziej my nie ličym palitviaźniami», — adkazaŭ Surykaŭ na pytańnie pra anarchistaŭ, što byli asudžanyja ŭ tym liku za napad na rasijskaje pasolstva.
«Pa astatnich jość pytańni. Biełaruskija i rasijskija ŭłady bolš miakka razhaniajuć akcyi. Nie ŭžyvajuć nikoli ślezaciečny haz. Adny ličać, što palitviaźni, naprykład, Zachad. Va ŭsich spravach treba raźbiracca».
«My, biezumoŭna, nie možam biełaruskamu boku zabaranić źbirać jakija b toje nie było aŭtamabili. Ale ŭźniknuć pytańni. My viedajem padatkovuju nahruzku, jakaja jość u Kitai. Viedajem i zarobki ichnija. My ŭsio razumiejem. Kali takoje rašeńnie adbudziecca, to ničoha zabaranić nie možam. Ale my nie chočam razburyć rasijski aŭtapram», — adkazaŭ Surykaŭ na pytańnie pra mahčymaść zborki kitajskich aŭtamabilaŭ u Biełarusi.
Pra Sajuz Biełarusi i Rasii Surykaŭ skazaŭ, što jon pamierci da 2015 hoda nie moža.
«Ja čytaju, što napisana „Jeŭrazijski ekanamičny sajuz“, jaki budzie ŭtvorany ŭ 2015 hodzie. Sajuz Biełarusi i Rasii prasunuty na paradak dalej i pamierci da 2015 nie moža. Kali Jeŭrazijski sajuz budzie prasoŭvać svaje paŭnamoctvy, to možna dumać. A pakul — nie», — adkazaŭ pasoł Surykaŭ na pytańnie pra źniknieńnie sajuznaj dziaržavy Biełarusi i Rasii.
