Były hiendyrektar abaronnaha pradpryjemstva paŭstanie pierad sudom 1

Va ŭpraŭleńni Śledčaha kamiteta Biełarusi pa Minsku zavieršana rasśledavańnie spravy pa častcy 3 artykuła 430 KK (atrymańnie chabaru ŭ asabliva bujnym pamiery słužbovaj asobaj za spryjalnaje vyrašeńnie pytańnia, jakoje ŭvachodzić vyklučna ŭ jaho kampietencyju) u dačynieńni da byłoha hienieralnaha dyrektara adnaho z AAT, što ŭvachodziać u sistemu Dziaržaŭnaha vajenna-pramysłovaha kamiteta. Kryminalnaja sprava ŭ dačynieńni da eks-kiraŭnika kampanii była raspačata ŭ lutym 2012 hoda.

Materyjały rasśledavańnia pieradadzienyja prakuroru dla nakiravańnia ŭ sud. Pra heta BiełaPAN paviedamiŭ aficyjny pradstaŭnik USK pa Minsku Alaksandr Hierasimaŭ.

Jakoje mienavita pradpryjemstva ŭznačalvaŭ abvinavačvany, Alaksandr Hierasimaŭ nie nazvaŭ. Adnak, pavodle źviestak BiełaPAN,

havorka idzie pra AAT «Ahat-elektramiechaničny zavod».

Ab raspačynańni kryminalnaj spravy ŭ dačynieńni da byłoha hiendyrektara było paviedamlena ŭ pačatku sakavika. Ciapier abvinavačvany hatovy pakryć uvieś uron, kab paźbiehnuć kryminalnaj adkaznaści.

Pavodle słoŭ Alaksandra Hierasimava, śledstvam ustanoŭlena, što pradmietam złačynnaj ździełki staŭ darožny katok, jaki ličyŭsia na bałansie asnoŭnych srodkaŭ dziaržpradpryjemstva, nie ekspłuatavaŭsia bolš za 10 hadoŭ i byŭ častkova raskamplektavany. Pavodle acenki ekśpiertnaj kamisii, praviedzienaj u vieraśni 2011 hoda, rynačny košt techniki skłaŭ 13 miljonaŭ 798 tysiač 800 rubloŭ. Hiendyrektar u siłu svaich paŭnamoctvaŭ mieŭ prava na adčužeńnie majomaści z vykanańniem usich nieabchodnych pracedur. Pry hetym ukazanaja suma pavinna była pastupić na rachunak pradpryjemstva. Adnak jon daručyŭ adnamu sa svaich padnačalenych znajści pakupnika na katok, hatovaha zapłacić bolš za aficyjnuju canu, kab roźnicu, nidzie nie dekłarujučy, možna było ŭ vyhladzie najaŭnych hrošaj prysvoić.

U studzieni 2012 hoda pakupnik byŭ znojdzieny. Im staŭ pradstaŭnik pryvatnaha ŭnitarnaha pradpryjemstva, hatovy zapłacić za techniku sumu, ekvivalentnuju 8 tysiačam dołaraŭ. Jon pahadziŭsia na ździełku na prapanavanych umovach. Pracedura ažyćciaŭleńnia kupli-prodažu adbyłasia ŭ lutym, kali była padrychtavanaja ŭsia nieabchodnaja dakumientacyja i praviedzieny ŭzhadnieńni z upaŭnavažanymi na heta słužbovymi asobami. Aficyjna na rachunak AAT pastupili zhadanyja amal 14 miljonaŭ rubloŭ, a roźnica — 6.300 dołaraŭ — była pieradadzienaja pakupnikom praz pasrednika hiendyrektaru. Adrazu paśla atrymańnia chabaru padazrony byŭ zatrymany, u prysutnaści paniatych hrošy i dakumienty, jakija paćviardžajuć aficyjnaje pahadnieńnie, vyjaŭlenyja i kanfiskavanyja.

Va ŭpraŭleńni SK pa Minsku źviartajuć taksama ŭvahu na toje, što padčas ažyćciaŭleńnia aktu kupli-prodažu darožnaha katka byli dapuščanyja jašče niekalki parušeńniaŭ, što znachodziacca ŭ vyklučnaj kampietencyi hiendyrektara. U pryvatnaści, na pradpryjemstvie nie była stvoranaja kamisija pa adčužeńni majomaści, jakaja adnosicca da asnoŭnych srodkaŭ, a taksama byli pieravyšanyja zakonnyja terminy realizacyi hetaj majomaści (zamiest troch dazvolenych miesiacaŭ z daty ekśpiertnaj acenki prajšło piać miesiacaŭ).

Abvinavačvany ŭtrymlivajecca pad vartaj.

Maksimalnym pakarańniem, praduhledžanym č. 3 art. 430 KK, źjaŭlajecca pazbaŭleńnie voli na termin ad 5 da 15 hadoŭ z kanfiskacyjaj majomaści i z pazbaŭleńniem prava zajmać peŭnyja pasady ci zajmacca peŭnaj dziejnaściu.

Viačasłaŭ Budkievič, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH