«Ja vielmi lublu Biełaruś, ale nie budu naviedvać Minsk, pakul nie budzie vyzvaleny apošni palitviazień»,— zajaviŭ kiraŭnik viedamstva fiederalnaha kanclera Hiermanii Ronald Pofała 8 červienia ŭ Vilni na sustrečy sa studentami Jeŭrapiejskaha humanitarnaha ŭniviersiteta.
«Nam ciažka zrazumieć staŭleńnie biełaruskaha režymu da palityčnaj apazicyi. Asabliva ŭličvajučy toje, što vyniki apytańniaŭ, jakija nam dastupnyja, havorać:
Łukašenka karystajecca padtrymkaj i ŭsio roŭna vyjhravaŭ by vybary. Viadoma, tam byli b užo nie tyja ličby, što atrymlivajucca ŭ vyniku falsifikavanych vybaraŭ, ale pryblizna 50% hałasoŭ jon dakładna atrymaŭ by», — skazaŭ Pofała.
Niamiecki palityk nie vyklučyŭ, što taki vynik, mahčyma, «byŭ by kryŭdnym» dla Alaksandra Łukašenki.
«Ale takija vybary zrabili b lehitymnym, u tym liku i dla Zachadu», — padkreśliŭ Pofała.Jon dadaŭ, što dla zachodnich palitykaŭ atrymać na vybarach padtrymku pałovy vybarščykaŭ — «užo vialiki pośpiech».
U svaim vystupleńni Pofała taksama zakranuŭ prablemu śmiarotnaj kary ŭ Biełarusi.
«Niekalki miesiacaŭ tamu my pieražyli dva pakarańni, jakija adbylisia niahledziačy na toje, što naziralniki paviedamlali: praces pa hetaj spravie nie adpaviadaŭ pryncypam pravavoj dziaržavy. Ja nie chaču vyłučać tezis ab mahčymaj nievinavataści złačyncaŭ, ale ja chaču tolki skazać, što ŭ pravavych dziaržavach takija pracesy doŭžacca miesiacami, pravodziacca šmatlikija ekśpiertyzy i, samaje hałoŭnaje, dziejničaje pryncyp, zhodna ź jakim lubyja sumnieńni traktujucca na karyść abvinavačanych», — skazaŭ niamiecki palityk.
Pofała padkreśliŭ, što ŭsie hetyja pryncypy nie byli zachavany ŭ sudzie nad Dźmitryjem Kanavałavym i Uładzisłavam Kavalovym, jakija byli abvinavačany ŭ teraryźmie i pakarany śmierciu praz try z pałovaj miesiacy paśla vyniasieńnia prysudu.
Zaznačyŭšy, što Jeŭrasajuz paprakajuć u marudnym pryniaćci rašeńnia pa pytańni sankcyj u dačynieńni da Biełarusi, Pofała zajaviŭ:
«Ja prytrymlivajusia punktu hledžańnia, što z sankcyjami treba być aściarožnymi, kab jany nie naškodzili biełaruskamu narodu».
Apošnim razam Pofała naviedvaŭ Biełaruś u listapadzie 2010 hoda. Jon udzielničaŭ u XIII Minskim forumie «Biełaruś i ES paśla kryzisu: vykliki i šansy ŭ śfierach palityki, ekanomiki i hramadstva». Padčas vizitu Pofała sustreŭsia z pradstaŭnikami ŭłady i hramadzianskaj supolnaści.
